- Publika iha: 15 Junho 2021
Governu liu husi Sekretariu Estadu protesaun Sivil (SEPS) halo ona apoiu rekuperasaun ba familia vitima iha suku lima (5) iha Dili laran hanesan, Bemori, Comoro, Kulu-Hun, Bekora no Balibar.
Sekretariu Estadu Protesaun Sivil (SEPS), Joaquin Gusmao Martins, hateten apoiu rekuperasaun ne’ebe governu halo hahu uluk husi Dili laran finaliza tiha tuir dados ne’ebe hatama depois, mak hakat ba munisipiu afetadu seluk.
Nia dehan, tuir dados ne’ebe ita asesu total familia ne’ebe mak tama iha tipu apoiu rekuperasaun iha Dili laran 3,000 resin mak identifikadu estragus.
“Husi Vitima sira ne’e governu halo ona apoiu rekuperasaun ba suku lima no total familia afetadu hamutuk 1,000,” SEPS Gusmao dehan iha knar fatin Kaikoli Dili.
Nia dehan, material ne’ebe sira ne’ebe apoiu ne’e parte rua, estragus normal no estragus total, tipu rua ne’e apoiu material no osan maun de obra ne’e diferente.
“Vitima estragus total hetan, kalen 0.30 tahan 50, pregu sapeo 2kg, 12 cm 2 kg, 10 cm 2kg, 7cm 2kg, besi beton 10mm 12 barra, besi beton 8mm 10 barra, aramen finu rolu 2, semente tonasa 40kg saka 35, no osan mao de obra $356 hodi selu badaen,” nia hateten.
Nia dehan, ba sira ne’ebe hetan estragus kaman, simu kalen ho pregu no osan maun de obra hamutuk $150 tanba sira la’os halo kontrudaun foun maibe rehabilita deit.
Alende ne’e nia dehan, semana tuir mai SEPS sei kuntinua ba halo apoiu rekuperasaun iha postu Atauru, depois mai kuntinua fali iha Dili.
Entretantu, Xefe Suku Comoro Eurico de Jesus hateten, total vitima ne’ebe mak identifikadu ona tama ba apoiu rekuperasaun iha suku Comoro tuir dados lolos ne’ebe mak rekoila ona hamutuk 2,763 husi aldeia 14 iha suku laran.
“Husi vitima 2,763 ne’e iha vitima 353 mak hetan ona apoiu rekuperasaun husi governu seluk seidauk,” Xefe suku Comoro Jesus dehan.
Nia dehan husi total vitima sira ne’e maioria husi aldeia 12 de outuru ne’ebe kuaze tama iha tipu apou estragus total, normal ne’e ida ka rua deit.