- Publika iha: 23 Junho 2021
Vice Presidente Executivu Komisaun, iha Empreza Publika Bee Timor-Leste (BTL, E.P), Gustavo da Cruz, informa sistema fornesementu bee moos iha kapital Dili rekuperadu no distribuisaun bee ba komunidade sira lao normal, hafoin hetan estragus husi inundasaun iha loron 4 fulan Abril tinan 2021, liu ba.
Nia dehan intervensaun ne’ebe sira halo iha situasaun emergensia maka sira konsegue instala tanki mobile hamutuk 100 resin iha suku no aldeia sira atu bele fornese bee moos ba komunidade sira, hodi hein ekipa halo rekuperasaun ba sistema fornesementu.
“Esforsu ne’ebe ami halo maka instala tanki mobile iha komunidade sira nia leet ami atende ho kareta tanki. Maibe semana rua liu ba sistema normal ona, entau dadaun ne’e ekipa halo dezmantela ou sobu tanki sira iha treinu atu dezmobiliza hodi utiliza iha futuru, karik akontese tan dezastre naturais ita iha ona material atu fo atendimentu emergensia,” nia hateten hafoin partisipa iha dialogu rede sosiedade sivil no governu konaba impaktu Covid-19 no inundasaun ba setor infrastruktura baziku iha salaun CNE Colmera, Dili.
Nia dehan iha parte Danau I, II, III no Maslidun, sira koloka kareta tanki tolu hodi fornese bee moos ba komunidade sira tanba sira maka hetan afeta makas ba iha inundasaun ne’ebe akontese iha fulan Abril liu ba.
Nia hatutan total konsumedor bee moos iha Dili hamutuk 17,000, maibe 30% deit maka kontribui reseita ba estado.
Iha parte seluk, Diretor Executivu Forum NGO Timor-Leste (FONGTIL), Daniel Santos do Carmo hateten povu sei kontinua halerik ba bee moos tanba tinan barak nia laran governu ignoral la halo investimentu ba setor produtivu, liu-liu infrastruktura baziku ne’ebe liga ba povu nia moris.
“Falta orsamentu, ita bo’ot sira hare investimentu ba bee kada tinan nunka atinji 5%, maske bee maka povu nia moris. Ita atu hadia povu nia moris no hasai povu husi kiak no mukit se bee laiha atu hemu no haris,” nia hateten.
Nia dehan iha planu estratejiku dezenvolvimentu nasional tinan 2011-2030, nia indikador sira seidauk atinji ida tanba indikador ida maka iha tinan 2020, bee tama ona iha uma kain ida-ida, maibe to’o agora laiha.