- Publika iha: 26 Agosto 2021
Diretora Servisu Saúde Munisipiu Dili, Agustinha Segurado hateten sira fo atensaun makas ba servisu armajenamentu no distribuisasun vasina husi sentral ba sentru saúde to’o iha postu vasinasaun sira atu asegura nafatin kualidade no efetividade vasina hodi forma imunidade ema nian hasoru infesaun Covid-19.
Nia dehan armajenamentu ba vasina Covid-19 no vasina rutina sira hanesan deit tanba ne’e fasilidade saúde hotu iha ona logistika ne’ebe apropriadu atu rai vasina no rekursu ne’ebe treinadu hodi kontrola temperatura.
“Ita iha fasilidade 27 iha munisipio Dili, fatin sira ne’e iha ona jelera ho kondisaun diak atu rai vasina. Hau garantia vasina rutina sira diak, entau vasina ba Covid-19 mos ita garantidu,” nia hateten iha Hotel Novu Turimus, Dili.
Nia hateten eletrisidade ne’e kestaun ida ne’ebe presiza konsidera no fo atensaun iha servisu kampanha vasinasaun, maibe ekipa vasinasaun treinadu atu halo jestaun diak ba vasina iha kualker situasaun ne’ebe sira enfrenta.
Nia hatutan bazea ba dadus progresu vasina hasoru Covid-19 husi fulan Abril to’o loron 18 fulan Agostu tinan 2021, munisipiu Dili iha atinjimentu ne’ebe diak tebes tanba kuaze sidadaun elejivel 51.4% mak kompleta ona dose daruak, no 71.5% mak simu ona dose dahuluk nian.
Nia informa ekipa taskforce munisipio Dili hamutuk ho autoridade lokal sira nafatin halo esforsu konsensializa komunidade sira atu hakbesik aan ba postu vasinasaun simu vasina atu iha imunidade ne’ebe forte hasoru infesaun Covid-19.
Iha parte seluk, membru parlamentu nasional, deputada Maria Fernanda Lay kestiona servisu EDTL, Empreza Publika, nian ne’ebe la garante sustentabilidade eletrisidade iha teritorio nasional tanba ahi kontinua mate lakan tantu iha kapital Dili no iha munisipio sira.
Nia dehan funsionamentu EDTL, E.P. tinan ida ona, maibe lahatudu mudansa iha atendimentu, ahi kontinua mate no iha fatin balun mate permanente.
“Kuaze tinan ida ona laiha mudansa, inklui iha Dili mos bairo balun ahi mate lakan, ne’e fo impaktu bo’ot ba ekipamentu eletronika populasaun nian,” nia hateten.
Nia hateten sira nia visita ba postu administrativu no suku sira iha area rural hare suku balun eletrisidade mate semana tomak, oinsa bele ajuda servisu sira ba kampanha vasinasaun.