- Publika iha: 29 Setembro 2021
Presidente Autoridade Munisipiu Dili, Guilhermina Filomena Saldanha informa katak sei fo prioridade atu hare no fo atensaun ba problema tolu importante mak jestaun dezastre naturais, jestaun merkadu, no orden publika tanba tama ona tempu udan monu rai.
Nia rekonhese la fasil lidera munisipiu Dili hanesan kapital nasaun nian tanba iha kompleksidade oioin iha area politika, dezenvolvimentu ekonomia, ambiente, abitasaun, infrastruktura no orden publika.
“La fasil tanba hau tama iha fulan Setembru, hela deit fulan tolu. Entau planu badak mak hare oinsa ita nia maluk sira ne’ebe hela iha fatin refujiadu tanba munisipiu Dili nudar sidade kapital nasaun nia lolos labele iha refujiadu, maibe situasaun ita tenke simu,” nia hateten iha Lecidere, Dili.
Nia dehan kestaun seluk mak hametin koperasaun servisu ho Polisia Nasional Timor-Leste (PNTL) atu mantein ordem publika hodi fo espasu ne’e diak no seguru ba sidadaun sira halo movimentu. No hadia jestaun merkadu sira atu negosiante sira labele okupa dalan publiku hodi faan produtu.
Nia hateten sira mos orienta ekipa atu servisu hamutuk ho ministerio relevante sira atu halo prevensaun ba dezastre naturais, liu-liu alerta ba komunidade sira ne’ebe hela iha fatin risku atu kuida tanba tempu udan monu rai.
Konaba dezenvolvimentu infrastruktura iha kapital Dili, nia dehan nafatin halo sosializasaun ba komunidade sira atu kontribui tanba kualker dezenvolvimentu ne’ebe halo sempre iha dezvantajen no ema balun sei afeta.
Iha parte seluk, Membru Parlamentu Nasional, Deputado Flabiao de Olivera kestiona servisu autoridade munisipiu no ministeriu turismu nian atu kontrola fasilidade publika sira iha fatin turismu hanesan estatua São Paulo II, Area Branca, Cristu Rei tanba barak mak aat no la funsiona.
“Hau hanoin iha ne’e deputado sira foti beibeik kestaun ne’e, maibe hau hakarak alerta tan dala ida fasilidade sira hanesan bee moos, haris fatin, jardin sira tenke hadia tanba iha uma balun mos agora ne’e monu tiha ona,”
“Se ita hakarak fo imajen ida ne’ebe diak ba ita nia populasaun sira atu paseiu tenke kria kondisaun ne’ebe adekuadu,” nia hateten.
Nia konsente situasaun agora ho pandemia Covid-19 limita movimentu sira, maibe importante tenke hadia no halo manutensaun regular ba fatin turismu sira atu bele kontribui reseita ba kofre estado iha futuru mai.