- Publika iha: 05 Outubro 2021
Sekretariu Estadu Protesaun Sivil (SEPS), simu ona pedidu husi reklamante vitima inundasaun 04 Abril iha teritoriu Timor-Leste laran, hamutuk 20,000 resin mak seidauk hetan apoiu emerjensia.
Diretor Jerál SEPS, Ismail Babo, hateten protesaun sivil simu lista reklamante vitima inundasaun husi sosiedade sivil.
“Ita simu ona lista reklamante lubuk ida mai husi sosiedade sivil konaba vitima inundasaun iha 04 Abril, akontese iha teritoriu Timor laran mak seidauk hetan apoiu emerjensia,” nia dehan.
Nia dehan, lista sira ne’e tama ona, maibe ekipa sei ba hamutuk ho autoridade lokal sira atu halo verifikasaun hodi hare situasaun real ne’ebe akontese iha terenu, depois los ona mak fo apoiu emerjensia.
“Inundasaun iha loron 04 Abril akontese laos akontese iha fatin ida deit, tanba ne’e Dili iha lista lubuk ida iha Tasi Tolu Masi Lidun, Bairu Pite, no Lahane, ita halo verifikasaun balun ita komesa fo ona apoiu emerjensia," Babo informa.
Nia afirma, apoiu rekopersaun ne’e ba deit vitima sira ne'ebe uma hetan estragus total, maibe sira neebe mak uma la estragus iha direitu hetan deit apoiu emerjensia.
Tanba ne’e, uma kain sanulu resin ida iha aldeia Suhurama, Suku Lahane, Postu Administrativu Nain Feto, Munisipiu Dili tama hotu iha lista reklamante.
“Lista reklamante ita simu 20,000 resin, ita sei halo verifikasaun ida idak, tanba ema ne’ebé ukun besik liu povu ne’e mak autoridade xefe adeia ho xefe suku sira, tanaba ne’e prosesu verifikasaun ne’e los ona ita fo apoiu emerjensia,” nia salienta.
Tuir dadus ne’ebe rekolla husi Sekretaria Estadu Protesaun Sivil ho Ministeriu Estatal, konaba vitima inundasaun 04 Abril iha teritoriu Timor laran tomak, total uma kain hamutuk 25,022 afetadu, no uma kain hamutuk 4,384 hetan estragus, inklui ema nain 46 lakon vida.
Entretantu, vitima inundasaun Maria da Silva hateten, komesa inundasaun husi dia 4 Abril mai to'o ohin loron sira seidauk hetan apoiu husi governu.
"Apoiu emerjensia mos ami seidauk hetan, to'o agora oinsa ho rekuperasaun," nia dehan.
Nia dehan, sira hatama ona lista ba governu maibe to'o agora governu seidauk halo verifikasaun hodi apoiu.
"Ami husu governu tenke loke matan hodi apoiu ami liu-liu iha area Bedois nian ne'e seidauk hetan apoiu,” nia hatete.