- Publika iha: 19 Outubro 2021
Iha Eventu Komemorasaun Loron Balibo Five, iha Posto Administrative Balibo, Eis Predizente Republica Democratica de Timor-Leste Ramus Horta husu jornalista sira atu kuntinua promove liberdade imprensa ida ne'ebe diak liu tan iha Timor-Leste.
Nia dehan, liberdade imprensa konsagra ona iha konstituisaun RDTL, katak jornalista sira tenke promove liu husi hakerek notisia ne'ebe mak faktus kredivel no los hodi hatudu nafatin profesionalisme ba mundo.
"Bainhira ita bo'ot sira hakerek notisia ne'ebe mak los no kredivel la iha membru governu ka lider ida atu sente la satisfas ho ita bo'ot sira nia publikasaun. Nune'e mos iha Timor governu seidauk taka jornal ka televizaun no ita la iha jornalista ida ne'ebe mak hetan kastigu iha komarka tanba halo sala. Ita agradese," Ramos Horta hateten.
Tanba ne'e nia dehan, ho situasaun hirak ne'e mak Timor-Leste hetan naran diak liu iha mundu liu-liu promove liberdade imprensa tanba ne'e tenke kuntinua.
"Ita husu ba media nain no jornalista sira kuntinua promove liberdade imprensa iha imi nia servisu lor-loron nian," Eis Prezidente RDTL Horta husu iha Balibo.
Alende ne'e nia dehan, jornalista Australiano nain lima ne'ebe mate iha Balibo iha tinan 1975 ne'e tanba promove liberdade imprensa no direitu humanus Timor-Leste nian tanba ne'e nia husu jornalista sira hotu atu lao tuir no kaer mafatin obra ne'ebe sira nain lima husik hela.
Iha fatin hanesan, Sekretariu Estadu Komunikasaun Sosial, Merisiu Juvinal "Akara", hateten tragedia Balibo ne'e fo hanoin ba povu Timor tomak katak partisipasaun jornalista importante iha sivilizasaun ne'ebe deit jornalista eziste hodi halo nia knar principal no servisu ba humanidade.
Nia dehan, knar jornalista sira importante no sira tau sira nia an iha kulker risku hodi hato'o lialos, tanba ne’e governu liu-liu Sekretario Estadu Komunikasaun Sosial no nia limitasaun tomak prontu atu kolabora hamutuk ho Konselhu Imprensa hodi tau jornalista iha nia fatin lolos no kualker prosesu dezenvovimentu iha Timor-Leste.
"Husu jornalista atu atualiza lolos ita nia an no lori nafatin lialos ba povu hodi valoriza jornaliata nain lima nia sakrifisiu ne'ebe mak sira halo ba Timor-Leste hodi hetan liverdade," SECOMS Akara hateten.
Tanba ne'e Jornalisa kuntinua fo lialos, kritiku ba situasaun hotu no iha VIII governu konstitusional sei la alergia ba kritika hirak ne'ebe hetan.
"Rai Balibo sai fatin proteje no asegura no kuntinua defende Konstiruisaun artigo 40-41 konaba liberdade imprensa no espresaun hodi promove demokrasia iha Timor-Leste," nia salienta.
Entretantu, Prezidente Konselhu Imprensa, Virgiliu Guterres husu ba instituisaun governu hotu atu funsiona didiak sira nia servisu relasaun publika hodi atribui informasaun ne'ebe klaru ba jornalista sira hodi publika ba sidadaun sira ne'ebe hakarak hetan informasau.
"Ami lakoi rona tan relasaun publika sira hatene informasaun la hatete ba jornalista sira ne'ebe mak buka informasaun," nia dehan.
Nia hateten, jornalisa sira nafatin servisu makas hodi promove liberdade imprensa hodi hametin nafatin demokrasia iha Timor-Leste.