Sexta, Janeiro 21, 2022

Presidente Kámara Komérsiu Indústria Timor-Leste (CCITL), Oscar Lima hateten governu tenke dezenvolve politika diak apoia setor privado nasional sai forte intermus jestaun, kapasidade no finanseiru molok sai membru Organizasaun Mundial Komersio (OMK) atu bele kompete ho setor privado husi nasaun membru seluk.

Presidente Kámara Komérsiu Indústria Timor-Leste (CCITL), Oscar Lima hateten governu tenke dezenvolve politika diak apoia setor privado nasional sai forte.

Nia salienta Timor-Leste hanesan nasaun ida labele izola aan husi organizasaun mudial sira, liu-liu organizasaun komersio atu dezenvolve ekonomia rai laran, maibe importante setor privado nasional tenke preparadu hodi kompete iha merkadu nasional no mundial.

“Dezafiu mak ita nia emprezario barak seiduak iha kapasidade atu ba kompete ho sira. Ami sira ne’e hamutuk nain 10 ema nain ida deit mai mos ami bele la aguenta tanba ne’e tenke kria kondisaun. Ami laos husu osan ba governu fo mai halo servisu, maibe fo kondisaun ba ami atu lao ho osan oituan ne’ebe ami iha,” nia hateten hafoin partisipa iha konsultasaun prosesu adesaun TL ba OMK iha Hotel Novu Turismo, Dili.

Nia hateten kondisaun barak ne’ebe governu tenke konsidera, maibe rua ne’ebe importante mak kria lei tau fundu iha banku komersial sira atu setor privado bele asesu ho jurus ne’ebe ki’ik, asesu ba rai, liu-liu implementasaun lei ba rai nian no lei seluk ligadu ba atividade komersio nian.

Nia hatutan governu iha dever atu apoia setor privado sira no seitor privado iha direitu atu hetan atensaun husi governu tanba setor privado mak hatama reseita ba estado, loke kampu servisu ba joven sira.

Entretantu, Diretur Executivu Servisu Rejistrasaun no Verifikasaun Emprezarial Instituisaun Publika (SERVE, I.P), Florêncio da Costa Sanches, hateten setor privado nasional seidauk preparadu ho diak atu kompete ho setro privado nasaun membru seluk tanba dadus hatudu 35,000 empreza ne’ebe registu iha sistema 10% deit mak halo produsaun.

“Tuir ami nia hare setor privado tenke hadia aan diak liu tan prepara hodi kompete tanba depois sai membru OMK ita bele asesu ba merkadu, maibe dezafiu bo’ot ba setor privado tanba ita bele produs sapatu, maibe labele ba iha nasaun estado membru sira kuandu kualidade ladiak no la kumpri padraun internasional nian,” nia hateten.

Nia dehan kestaun importante ne’ebe governu tenke hare mak legislasaun no regulamentu sira tenke apoia setor privado labele regular deit no haforsa kapasitasaun ba rekursu humanu rai laran.

Iha parte seluk Kordenador Sekretariado Adesaun Timor-Leste ba OMK, Cesar Quintas hateten durante prosesu ne’e sira indentifika ona lacunas lubuk ida iha aspeitu tolu mak infrastruktura, rekursu humanu no legislasaun tanba seidauk iha lei ne’ebe kompletu ba atividade komersio nian.

“Ita atu halo revizaun no lei ruma tenke informa ba sira atu labele iha diskriminasaun, laos ba Timor deit, maibe ba ema iha liur mai mos hetan tratamentu diak. Ne’e mak objetivu principal atu iha komersio ne’ebe transparante laiha korupsaun,” nia hateten.

Nia dehan dadaun ne’e Timor-Leste atraves husi OMK nian hetan ona apoia husi nasaun seluk hanesan Australia no Nova Zelandia atu fo formasaun lingua Ingles, liu-liu linguajen tekniku komersio nian ba instituisaun save sira. No iha mos apoia ba setor privado area hospitalidade no setor kafe nian, liu-liu atu hadia kualidade kafe timor nian.

E-mail Subscription

Enter your email address:

Follow us on Twitter

  • House Banner Side Bar 02
  • House Add Side Banner 04