Sexta, Março 29, 2024
Total visitors: 766366

Xefe Departamentu Saneamentu Munisipiu Dili, Domingos dos Santos Soriano hateten governu kontratu kareta trek 55 ho pesoal nain 220 mak raut foer no tula foer sira husi sidade Dili ba iha fatin liseira Tibar.

Xefe Departamentu Saneamentu Munisipiu Dili, Domingos dos Santos Soriano hateten governu kontratu kareta trek 55 ho pesoal nain 220 mak raut foer no tula foer sira husi sidade Dili ba iha fatin liseira Tibar.

Nia dehan kareta 55 ne’e la sufisiente atu rekolha lixu iha fatin sira hotu iha sidade laran tanba lixu ne’ebe sira raut laos deit lixu uma kain, maibe lixu husi atividade komersial sira.

“Governu agora dadaun ne’e aluga hela kareta 55 hodi movimentu hasai lixu iha sidade laran lori ba liseira Tibar, maibe ita hare husi fulan Dezembru to’o mai agora volume lixu makas tebes to’o agora ami seidauk foti hotu,” nia hateten iha servisu fatin Matadoru, Dili.

Nia hateten iha tinan 2020, bazea ba dekretu lei numeru 33/2009, sira hasai sirkular ida ba estabelesementu komersial sira atu bele halo jestaun rasik ba lixu ne’ebe sira produs tanba governu prepara kareta hodi foti deit lixu uma kain nian, maibe implementasaun lahalao no volume lixu aumenta makas.

Nia hatutan total fatin lixu temporario iha sidade Dili ne’e hamutuk 237, ne’ebe barak mak laiha kondisaun ona atu komunidade sira utiliza tanba ne’e dalabarak komunidade soe lixu iha liur deit hodi naklekar iha sidade laran.

Nia informa tuir kontratu loron ida kada kareta tenke raut foer karada tolu husi Dili ba liseira Tibar tanba ne’e dalabarak kareta movimentu dala tolu ona, maibe lixu sei nafatin iha.

Iha parte seluk, Xefe Suku Comoro, Eurico da Costa de Jesus husu autoridade munisipiu Dili atu fo atensaun ba servisu saneamentu nian, liu-liu tenke pontual halo pagamentu ba kompaña sira atu labele prejudika servisu iha baze.

Nia dehan preokupasaun ne’ebe pesoal saneamentu sira hato’o beibeik mak pagamentu tarde, entau la motiva sira atu halo servisu ne’ebe nakonu ho risku ba saúde publika sira nian.

“Sira presiza fo atensaun ba manutensaun ema nia kareta no pagamentu tenke pontual. Labele husik fulan tolu mak seluk ema sira deve kios barak ona no kareta mos labele halai tanba mina laiha,” nia hateten.

Nia dehan sira papel atu fo edukasaun hasa’e konsensia publika konaba impaktu lixu ba saúde publika no orienta komunidade halo limpeza.