- Publika iha: 16 Janeiro 2022
Diretur Executivu Hospital Nasional Guido Valdares (HNGV), Doutor Alito Soares hateten sira fo fulan tolu husi Janeiru to’o Marsu tinan 2021, ba visitante no akompañante pasiente sira utiliza parajen ho gratuita, maibe depois periodu fulan tolu veiculo para liu oras hat tenke selu.
Nia dehan sira halo ona kordenasaun ho Diresaun Nasional Transportes Terrestres (DNTT) atu implementa kobransa ba parajen A ne’ebe indika ba visitantes sira tuir referensia kobransa ne’ebe governu aplika ona iha estasionamentu dalan publiku sira.
“Husu mos ba familia bo’ot area Bidau Toko Baru nai xefe suku, seguransa sira no komunidade ne’ebe hela besik hospital atu apoia liu husi kumpri sinais sira ne’ebe iha estrada publiku no sinais parajen sira iha area hospital laran atu labele perturba movimentu ambulansia karik lori pasiente kritiku sira mai hospital nasional, liu-liu sala emergensia,” nia hateten hafoin partisipa iha serimonia inagurasaun estasionamentu veiculo HNGV Bidau Toko Baru, Dili.
Nia konsente fatin ou parajen ne’ebe prepara nafatin la sufisiente atu akumula ema hotu tanba kada loron sira simu pasiente hamutuk 700 resin ho akompaniante nain 3 kada pasiente, maibe nafatin halo esforsu atu implementa regras sira atu redus engrafamentu iha koridor hospital nasional hodi fasilita atendimentu ne’ebe lalais liu tan ba pasiente sira ne’ebe presiza atendimentu urgente.
Nia informa projeitu rehabilitasaun parajen hat ne’e implementa husi kompaña Goven Star, Unipesoal.LDA, Carame Unipessoal, LDA, União 17, Unipessoal, LDA ho kustu orsamentu $120,000.
Entretantu, Komadante Tranzitu Munsipiu Dili, Inspektur Domingos Sarmentu Gama enkoraja pessoal seguransa sira iha hospital nasional uza regras internal, kondigu estrada hodi foti medidas hasoru sidadaun sira ne’ebe komete viola regras no lei kodigu estrada.
Nia dehan lei kodigu estrada numeru 6/2003, koalia klaru konaba regras estasionamentu no sinais transzitu sira ne’ebe goveru monta ona iha dalan publiku sira.
“Organiza estasionamentu sira ne’e responsabilidade seguransa iha HNGV nian, ita iha forsa instituisaun estado iha forsa tanba lei fo dalan atu halo atuasaun ba inflasaun sira ne’ebe sidadaun sira halo,” nia hateten.
Nia hateten komunidade la kumpri regras no regulamentu interna HNGV nian, bele uza kodigu estrada no kodigu penal atu kriminaliza sira, liu-liu artigu 244 konaba dezobedensia.
Nia hatutan tuir kodigu penal artigu 244 dezobedensia bele hetan pena prizaun tinan tolu ou multa.