- Publika iha: 19 Janeiro 2022
Iha ambitu dialogu aberta ho Primeiru Ministru Taur Matan Ruak no membrus sira governu nian, Xefe Suku Villa Verde, Abdul Mancoli Arranhado, husu governu atu halo rehabilitasaun ba sede suku sira iha munisipiu Dili tanba numeru populasaun aumenta barak no espasu la sufisiente atu atende ba komunidade sira ho diak.
“Ami husu atu halo rehabilitasaun ba sede suku sira hotu tanba durante ne’e fatin klot kuartu rua deit halo servisu ladiak, no bee moos laiha ho gudan mos laiha,” nia hateten bainhira partisipa iha dialogu aberta ho Primeiru Ministru Taur Matan Ruak no membrus governu iha salaun Centru Convensaun Dili.
Nia dehan problema ne’ebe komunidade sira enfrenta makas mak infrastruktura bazika, liu-liu estrada, valeta, bee moos, saneamentu no problema drainagen ne’ebe la apropriadu ona atu akumula bee sira ho diak hodi rezulta inundasaun iha fatin barak.
Iha oportunidade ne’e, nia mos hato’o agradesementu ba governu, ne’ebe rekonhese ona sira nia servisu sira liu husi desizaun hasa’e subsidiu xefe suku sira husi $120 dolar Amerikanu ba $150 kada fulan.
Iha parte seluk, Ministru Administrasaun Estatal (MAE), Miguel Pereira de Carvalho rekonhese sede suku aktual harii iha tinan 2005 to’o 2006, seidauk iha rehabilitasaun tanba ne’e hahu tinan 2021, sira halo ona rehabilitasaun sede suku hamutuk 250, iha teritorio tomak.
“Hahu tinan 2021, ita rehabilita sede suku hamutuk 250 iha teritorio tomak, no iha tinan 2022, sei rehabilita tan 150. Entau hela deit ona 50, ita rehabilita iha tinan oin,” nia hateten.
Nia dehan iha munisipiu Dili tinan kotuk 2021, rehabilita sede suku 6 no tinan 2022, ne’e sei rehabilita tan suku 11. Signifika 17 sede suku husi 31 mak rehabilita ona, la inklui suku iha postu Administrativu Atauro tanba hahu Janeiru tinan 2022, Atauro sei sai ketak husi Dili.
Nia informa tinan 2021, sira mos sosa ona komputador hamutuk 452 kompletu ho printer ida-ida atu distribui ba iha sede suku sira hodi fasilita servisu administrasaun iha nivel lokal.