- Publika iha: 10 Janeiro 2023
Xefe Suku Camea postu-administrativu Cristu Rei, munisípiu Díli, Matos da Costa hateten inisiu tinan 2023, ema hotu sente preokupadu ho presu produtu nesesidade báziku iha merkadu ne’ebé sa’e no karun.
Nia salienta mosu inflasaun tanba ekonomia merkadu importadu, nasaun produtór hasa’e folin iha implikasaun mós ba Timor-Leste, no governu mós hasa’e ona taxa importasaun, entaun implika ba folin iha merkadu.
“Ami iha dadus, ami hatene sira-nia atividade lorloron ne’ebé sira halo. Sira balun funsionáriu ho nivel 2 no 3 mós preokupa ho folin sasan ne’ebé karun, oinsa sira ne’ebé laiha saláriu. Ami-nia komunidade maioria mai ho vida agrikultura no negósiu kiik hanesan faan ai-maran, faan animál, faan sasan rahun sira hodi sustenta moris,” nia hateten iha Matadoru, Díli.
Xefe Matos mós eziji responsabilidade governu, liu-liu ministériu relevante atu halo kontrolu ba presu iha merkadu no sosializa lei ba operadór ekonómika sira atu labele hasa’e folin produtu tuir sira-nia hakarak, liu-liu produtu nesesidade báziku tanba povu kiik mak sei terus.
Iha parte seluk, Prezidente Komisaun D, iha Parlamentu Nasional, trata asuntu Dezenvolvimentu no Ekonómiku, Deputadu Antónino Bianco hateten operadór ekonómiku ne’ebé hasa’e folin produtu arbiru ne’e krime tanba iha diskusaun Orsamentu Jerál Estadu 2023, hasa’e taxa impostu ba produtu seletivu no produtu sira ne’ebé afeta ba saúde públika.
“Agora ita buka hanoin atu salva populasaun husi sasan sira ne’ebé afeta ema nia moris, la’ós sasan sira ne’ebé kiik oan hotu aproveita tanba ne’e mak AIFAESA tenke la’o no parlamentu rasik tenke asume responsabilidade atu kontrola negosiante sira,” nia hateten.
Nia hateten produtu sira ne’ebé afeta saúde públika tenke aplika duni taxa tanba dadus estatístika sidadaun barak mak sofre moras ran midar, la’ós de’it ferik-katuas sira maibé joven sira mós mate ho idade kiik.