- Publika iha: 11 Janeiro 2023
Xefe Tékniku Estasionamentu Munisípiu Díli, Joni Mesquita Pereira Carceres informa períodu tinan 2022, munisípiu Díli konsege rekolla taxa ho montante $31,998.05 husi zona estasionamentu hodi kontribui ba kofre estadu.
Nia salienta bazeia ba rezolusaun governu númeru 3/2017, defini iha zona haat (4) hetan aplikasaun taxa, inklui zona Avenida Liberdade Imprensa, Merkadu Taibesi, Rua Avenida 25 Abril, no Rua Avenida 20 de Maio.
“Iha livru ne’e motorizada selu $0,10 oras ida, kareta $0,25 oras ida, no kareta bo’ot $0,50 ba oras ida. Entaun loron ida ofisiál estasionamentu sira bele hatama $5 dolar até $6 dolar, depende ba movimentu iha zona sira-ne’e,” nia hateten iha servisu fatin Matadoru, Díli.
Nia dehan tinan 2023, munisípiu Díli planu ona atu loke tan zona ida iha merkadu Manleuana no zona Hospital Nacional Guido Valadares (HNGV), ne’ebé iha hela diskusaun.
Nia hatutan totál ofisiál estasionamentu iha Díli laran hamutuk na’in 38, ne’ebé kompostu husi feto no mane.
Iha parte seluk, Koordenadór Jestór Merkadu Taibesi, António Manuel Araújo hateten servisu rekollamentu koima ba vizitór sira la’o di’ak tebes tanba ema hotu iha konsiénsia atu kumpri sira nia dever nu’udar sidadaun.
“Iha área merkadu ha’u sempre koopera hodi haree espasu sira-ne’e atu bele hetan reseita,” nia hateten.
Nia observa zona estasionamentu merkadu Taibesi kontribui reseita ne’ebé natoon ba kofre estadu tanba lorloron movimentu bo’ot no vizitor sira mós kumpri sira-nia dever atu selu espasu ne’ebé sira uza.