Sexta, Março 29, 2024
Total visitors: 766366

Prezidente Repúblika, José Ramos Horta apela ba parseru internasionál sira hotu atu lalika tau osan ba programa governu nian tanba governu iha osan bo’ot ona no kapasidade lato’o atu ezekuta hotu, envez tau osan apoia sosiedade sivíl no institusuan igreja sira hodi ezekuta programa.

Prezidente Repúblika, José Ramos Horta apela ba parseru internasionál sira hotu atu lalika tau osan ba programa governu nian.

“Ha’u halo apelu ba parseru internasionál sira hahú husi Australia ba termina iha letra Z, favor lalika tau osan ba programa governu nian tanba governu nia orsamentu bo’ot ona laiha kapasidade ezekuta. Di’ak liu haree estratéjia seluk ida direitamente ho parseru ajénsia sira hanesan UNICEF no seluk tan halo parseria ho NGO no Institusaun Igreja sira,” nia hateten bainhira partisipa iha dialogu nasionál entre labarik ho governu no parseru sira ho tema Rona Ami Labarik Nia Lian Hodi Asegura no Realiza Ami nia Direitu, ne’ebé organiza ho Instituto para a Defesa dos Direitos da Crianças (INDDICA), iha Sentru Konvensaun Díli.

Prezidente Horta mós sujere atu lalika gasta tan osan ba atividade enkontru, workshop sira kona-ba demokrasia tanba demokrasia sufisiente ona ba Timor-Leste, di’ak liu tau osan ba de’it dezenvolvimentu rurál atu hadia povu nia moris.

Entretantu, Embaxadór Japaun iha Timor-Leste, Tetsuya Kimura hateten kooperasaun governu Japaun no Timor-Leste tinan barak ona iha setór oioin, liu-liu setór edukasaun no saúde.

Nia dehan sira servisu hamutuk ho governu hodi avansa edukasaun, liu-liu dezenvolve siénsia no matemátika nian. Servisu hamutuk mós ho organizasaun sosiedade sivíl sira ba asuntu empoderamentu ekonomia feto no saúde inan no oan.

“Ami iha kompromisu atu servisu hamutuk ho povu Timor-Leste ho intensaun atu kria sosiedade ida-ne’ebé labarik sira bele seguru no bele halo papel sira ba kriasaun futuru ida ne’ebé seguru no prósperu iha país ida-ne’e,” nia hateten.

Iha parte seluk, Reprezentante UNICEF, iha Timor-Leste, Bilal Aurang Zeb Durrani hateten sira prontu hamutuk ho parseiru sira hanesan governu Japaun kontinua suporta governu Timor-Leste nia esforsu atu alkansa progresu ba labarik sira iha Timor-Leste.

“Ami sei la deskansa to’o labarik sira hotu iha Timor-Leste, goza ona sira-nia direitu hotu,” nia hateten.

Nia apresia ho komitmentu polítika Prezidente Repúblika nian ne’ebé tau labarik hanesan prioridade aas liu, ho nia vizaun mak Timor-Leste ida ne’ebé mak laiha labarik ida mate hafoin moris mai no ne’ebé labarik ida-ida saudável, nutrisaun di’ak, aprende ho seguru.