Quinta, Março 28, 2024
Total visitors: 766366

Funsionáriu Públiku, iha Ministériu Saúde, José Carvalho hateten funsionáriu idade avansadu tinan 60 ba leten obrigadu kontinua servisu iha administrasaun públika tanba seidauk iha lei atu fó garantia ba sira-nia direitu pensaun husi governu.

Funsionáriu Públiku, iha Ministériu Saúde, José Carvalho hateten funsionáriu idade avansadu tinan 60 ba leten obrigadu kontinua servisu iha administrasaun públika tanba seidauk iha lei atu fó garantia ba sira-nia direitu pensaun husi governu.

Funsionáriu ho idade tinan 71 ne’e, dehan pesoalmente hatama ona dokumentu ba diresaun rekursu humanu, maibé laiha rezultadu kontinua servisu no lahatene to’o bainhira mak reforma.

“Oinsá ami sira tinan 71 ona ne’e, sei hamrik hela hanesan ne’e. Dehan tinan 60 ba leten reforma ona ami bainhira. Ema bo’ot sira reforma hetan pensaun vitalisia ami sira-ne’e hetan pensaun vitalisia ka la’e tanba ne’e ami-nia ezijénsia,” nia hateten bainhira partisipa iha atividade diseminasaun dekretu lei nú. 86/2022, 14 Dezembru, primeira alterasaun kareira profisionál saúde, iha salaun Delta Nova Comoro, Díli.

Entretantu, Enfermeiru Francisco Babo hateten tinan-tinan funsionáriu sira-ne’ebé iha idade 60 ba leten simu karta husi ministériu kona-ba reforma, maibé depois laiha kontinuasaun nafatin hala’o servisu.

“Tinan-tinan naran ba hela de’it atu aplika buat ruma ami seidauk hetan esplikasaun klaru tanba lei ba reforma funsionáriu públiku seidauk iha, entaun ami-nia kolega balun servisu to’o mate de’it,” nia hateten.

Nia husu Komisaun Funsaun Públika atu elabora lalais lei pensaun ba funsionáriu sira-ne’ebé servisu tinan barak ona pensaun laiha garantia ba saida.

Iha parte seluk, Prezidente Komisaun Funsaun Públika (KFP), Faustino Cardoso Gomes hateten iha polítika refoma ba funsionáriu sira iha ona prosesu tanba Parlamentu Nasionál aprova ona lei autorizasaun ba governu atu elabora lei regula kona-ba reforma nian.

“Ita hotu hatene katak polítika reforma ne’e agora iha hela prosesu. Iha hela prosesu hahú husi autorizasaun legislativa ne’ebé parlamentu aprova tiha ona. Liuhusi lei ne’e parlamentu delega kompeténsia legislativa sira balun ba governu atu avansa ho elaborasaun téknika hodi regula kona-ba reforma ninian. Prosesu elaborasaun ne’e liu mós husi diskusaun atu asegura ema sira idade 60 ba leten ne’e aplika ba oin ka ba kotuk,” nia hateten.

Nia rekoñese funsionáriu públiku barak mak iha idade reforma ona, maibé sei kontinua servisu iha administrasaun públika.