- Publika iha: 23 Março 2023
Ekipa Feto Prontu Lidera (EFPL) ne’ebé forma husi organizasaun feto sira nune’e Sekretáriu Estadu Iqualdade no Inkluzaun (SEII) husu jornalista sira tenke promove partisipasaun feto no asuntu inkluzaun iha prosesu eleisaun liuhusi kobertura no publikasaun sira.
Diretora Movimentu Feto Foinsa’e Timor-Leste (MOFFE-TL), Yasinta Lujina, dehan EFPL iha nia kuadru estratéjiku oinsa atu orienta no hasa’e partisipasaun feto no haforsa lideransa feto iha prosesu eleisaun nian.
“Liu husi briefing ne’ebé ekipa feto prontu lideransa realiza ho jornalista sira, ita enkoraga maluk jornalista sira tanba sira iha papel importante hodi fahe informasaun ba iha sosiadade liu husi kobertura, hakerek no publika. Ne’e tenke promove feto no asuntu iqualdade jéneru liga ho eleisaun ne’ebé sei mai,” nia dehan iha Dili.
Tanba ne’e nia dehan, iha figura feto ne’ebé atu hola parte iha prosesu eleitorál sai hanesan kandidata an no sira-ne’ebé potensiál hodi reprezenta sira-nia partidu dala barak partisipasaun iha prosesu eleitorál ema ladun hareee tanba kobertura ne’ebé jornalista sira halo ladun ajuda hodi foka sai sira-nia perspetiva, ideia, no hanoin diak sira ba sosiadade,
“Ita husu ba jornalista sira atu konsidera no promove partisipasaun feto no asuntu inkluzaun iha prosesu eleisaun, tanba ita hakarak eleisaun ne’ebé ita atu hala’o hanesan, eleisaun parlamentár, suku no eleisaun munisipál, tenke eleisaun ne’ebé mak inkluzivu,” Diretora Lujina dehan.
Nia dehan, durante prosesu eleitorál ne’ebé akontese durante ne’e jornalista sira promove liu husi mane maibé partisipasaun feto ne’e ladun promove, tanba ne’e liuhusi briefing refere atu bele tulun maluk jornalsita sira bele halo kobertura ne’ebé inkluzivu iha eleisaun.
Enkuantu dadaun ne’e totál feto ne’ebé mak tuur iha parlamentu nasional iha feto na’in 26 no feto ne’ebé hanesan Xefe suku iha 21 no Xefe Aldeia na’in 73 iha territóriu laran.
Entretantu, Reprezentante Sekretária Estadu Iqualdade no Inkluzaun (SEII) no Xefe Departamentu Empoderamento Ekonomia no Partisipasaun iha Polítika, José do Rosario de Carvalho dehan, iha tinan ida-ne’e sei hasoru eleisaun tolu, parlamentár, suku no munisipal tanba ne’e SEII nafatin ho liña ministeriu sira liuhusi Komisaun Nasional Eleisaun (CNE), Sekretariadu Tékniku Admistrasaun Eleitorál (STAE) no partidu polítiku sira atu asegura papel feto iha nivel foti desizaun.
“Ita hakarak promove jornalista sira atu bele kobertura sensivel ba jéneru, ita haree papel media importante tebes iha komunidade nia matan, tanba ne’e husu ba jornalista atu publika informasaun ho krebilidade no labele hamosu diskriminasaun ba feto no mane iha eleisaun nune’e bele promove inkluzivu,” nia salienta.
Nia dehan, jornalista sira tenke sensivel ba jéneru tanba papel media importante ba iha komunidade tanba ne’e tenke fahe informasaun ho kredibilidade no labele hamosu diskriminasaun ba feto sira nune’e mós maluk difisiénsia sira.