Domingo, Julho 14, 2024

Prezidente Repúblika Timor-Leste, Jose Ramos Horta, husu filmaker Timoroan sira tenke kontinua promove abilidade iha sinema, tanba haree ba filme hirak ne’ebé prodús kada tinan iha eventu Díli Internasional Film Festival (DIFF), filmaker joven Timoroan barak mak iha abilidade di’ak kona-ba acting nian.

Prezidente Repúblika Timor-Leste, Jose Ramos Horta, husu filmaker Timoroan sira tenke kontinua promove abilidade iha sinema.

Prezidente Horta dehan, rezultadu kompetisaun iha DIFF ne’e filmaker Timoroan sira-ne’e prodús filme mesak kualidade di’ak de’it, tanba ne’e husu atu promove liutan iha sinema.

“Ha’u husu ba filmaker Timoroan sira kontinua promove abilidade ne’ebé mak imi iha kona-ba acting nian iha sinema,” PR Horta dehan, iha eventu DIFF23 iha Timor-Plaza, Díli.

Nia dehan, filme hirak ne’ebé durante ne’e filmaker Timoroan sira prodús ne’e kualidade di’ak tebes, tanba haree liuba kultura, nune’e mós inteletualidade Timor nian.

“Haree ba filme hirak ne’e ha’u sei fó prémiu ba sira hodi valoriza sira-nia abilidde iha munddu acting nian maské sira la manan iha kompetisaun Díli Internasional Festival Filme 2023,” PR Horta informa.

Nia dehan, iha ona komunikasaun ho actor Internasional sira husi Indonesia no Japaun atu bele fó kapasitasaun ba filmaker Timoroan sira hodi dezenvolve di’ak liutan sira-nia talentu iha mundu ekting nian.

Enkuantu kompetisaun DIFF tinan 2023 ne’e kompete husi grupu juventude kreativu feto no mane hamutuk na’in 14.

Iha fatin hanesan, Filmaker Internasional Cristina Hakim dehan, durante nia partisipa iha Díli Internasional Film Festival, iha Timor-Leste ba dala rua ne’e haree katak, joven Timoroan sira hatudu acting di’ak, nune’e mós haree ba Prezidente Repúblika mós iha interesante tebes hodi promove filmaker Timoroan sira iha mundu filme.

“Ha’u fiar katak liuhusi Díli Internasional Film Festival bele lori impaktu pozitivu hanesan materia ba joven fimaker Timoroan atu bele dezenvolve liutan, tanba festival ne’e bele realiza relasaun di’ak entre filmaker Timoroan nune’e mós filmaker internasional sira hodi hasoru no fahe esperiénsia ba malu,” nia dehan iha Timor-Plaza.

Nia dehan, dezenvolvimentu filme iha Timor-Leste ne’e di’ak tebes, tanba parte duadór sira iha vizaun no misaun ne’ebé hanesan, suporta malu hodi dezenvolve área filme iha Timor-Leste.

“Ha’u mós prontu atu tulun saida de’it ne’ebé presiza nune’e mós ha’u espera katak husi parte Embaixada Indonesia iha Timor-Leste mós bele kria relasaun di’ak entre filmaker Timor-Leste no Indonesia,” Aktor Internasional Hakim dehan.

Tanba ne’e nia husu ba filmaker Timoroan sira atu kontinua aprende iha mundu acting nian nune’e bele kontinua dezenvolve sinema iha rai laran.