Domingo, Junho 16, 2024
Total visitors: 766366

Presidente Autoridade Munisípiu Dili, Guilhermina Filomena Saldanha Ribeiro hateten iha dia 10 fulan Outubro tinan 2023, sidade Dili halo tinan ba dala 254 husi transferensia Lifaun Oecusse mai Dili. Maibe sei nafatin dezorganizadu, lixu iha fatin-fatin, animal husik livre, mosu baraka barak iha valeta leten, mota ibun, tasi ibun.

Presidente Autoridade Munisípiu Dili, Guilhermina Filomena Saldanha Ribeiro hateten iha dia 10 fulan Outubro tinan 2023, sidade Dili halo tinan ba dala 254 husi transferensia Lifaun Oecusse mai Dili.

Nia dehan governu halo esforsu tomak atu halo sidade Dili sai moos, seguru no organizadu, maibe importante komunidade sira tenke kontribui, liu-liu kumpri regras no regulamentu sira ne’ebé governu hasai katak orario soe foer, labele halo uma iha valeta leten, mota ibun, tasi ibun, labele faan iha tortoar leten no jardin sira.

“Husu ba ita ita nia komunidade sira mai ita hamutuk kaer liman hadia ita nia sidade, labele hanoin deit governu mak tenke tau osan hamoos. Se ita hotu-hotu mak iha konsensia lao hare plastiku ruma foti tau iha fatin lixu no labele naran soe foer arbiru mak sidade sei moos,” nia hateten hafoin partisipa marsa saudavel ba selebrasaun aniversariu sidade Dili ba dala 254, iha edifisiu Munisipiu Dili.

Nai hateten dekretu lei numeru 33/2008, konaba ijiene no órden Públika bandu labele soe lixu arbiru, halo uma iha valeta leten, mota ibun, labele husik animal. No sidadaun sira ne’ebé viola sei hetan sansaun koima husi $5 dolar amerika to’o $500 dolar amerika, maibe seidauk aplika tanba kondisaun la premite.

Nia hatutan tuir diploma ministerial, orario soe foer iha meia noite to’o tuku 6:00 madrugada atu tuku 7:00 dader ekipa saneamentu halo rekolhamentu no transporta ba fatin lixeira iha Tibar.

Iha parte seluk, Vice Ministru Estatal, Jacinto Rigoberto hateten liu husi aniversariu ne’e, nafatin fo hanoin komunidade sira atu foti mos responsabilidade hamutuk asegura sidade Dili moos, seguru no organizadu tanba dezenvolve sidade sai diak liu ne’e presiza investimentu bo’ot.

“Oinsa sidade ne’e sai sidade furak ne’e papel integradu ministeriu hotu-hotu nian, liu-liu ministeriu planeamentu ordenamentu teritorio. Ita hakarak sidade ne’e tenke halo planu ida ne’ebe integradu, klaru nia investimentu ne’e laos ki’ik presiza investimentu ida ne’ebé bo’ot,” nia hateten.