- Publika iha: 08 Junho 2024
Diretora Ezekutiva Fundasaun Alola, Maria Imaculada Guterres, hateten Alola Foundation hamutuk ho autoridade lokál postu administrativu Vera Cruz, suku Motael, halo serimónia deklarasaun kona-ba ba programa Area La Soe Foer-Boot Arbiru (ALFA).
Nia dehan, atu implementa programa ALFA ne’e la'ós fasil, tanba atu muda mentalidade komunidade sira-nian, ne’e susar tebes, maibé liuhusi esforsu husi autoridade lokál no Ministériu Saúde bele muda ona konsiénsia komunidade nian, atu labele soe fo'er boot arbiru.
“Durante ne’e ita konsegue identifika komunidade uma-kain hitu (7) iha suku Motael mak la iha sintina, maibé liuhusi programa ALFA ita esforsu liuhusi hasa'e konsiénsia komunidade nian, oinsá atu bele harii rasik sira-nia sintina, atu nune’e bele garantia katak, sira livre husi ambiente ne’ebé la soe fo'er boot arbiru, ambiente ne’ebé saudavel no ijiene,” nia dehan hafoin remata halo deklarasaun.
Nia hatutan, programa ALFA ne’e hala'o kedas iha tinan kotuk liuba, maibé tanba tinan kotuk 2020 hasoru problema oin-oin, entaun la konsegue kontinua, no kontinua fali iha tinan 2022 to’o mai agora.
Iha parte seluk, Xefe Suku Motael, Luis Antonio Candido hateten, durante sira identifika komunidade balun ne’ebé iha Suku Motael la iha sintina, maibé liuhusi programa ALFA ne’e bele motiva ona komunidade ne’e hodi halo rasik sintina.
“Iha tinan kotuk 2020 ami identifika ona katak, iha komunidade uma-kain 7 iha Suku Motael mak la iha sintina. Sira liga direita paralón mai iha bee dalan, maibé liuhusi esforsu ami-nian no Ministériu Saúde fó hanoin ba sira, ikus sira bele halo rasik sintina,” nia dehan iha Suku Motael, Díli.