- Publika iha: 08 Junho 2024
Diretór Servisu Saúde Munisípiu Díli, Mateus Pinto hateten, iha Munisipiu Díli identifika ona komunidade uma-kain ne’ebé hela iha Díli ho porsentu hitu (7%)mak to’o agora seidauk iha sintina.
Nia dehan, bainhira identifika komunidade balun la iha sintina, entaun tenki fó formasaun ba sira maibé servisu ida-ne’e la fasil atu implementa, tanba komunidade iha Timor-Leste ne’e toman ona kuandu atu fó formasaun ruma tenki lori buat ruma hodi ba fó ba sira, sei ba ho liman mamuk entaun komunidade sira sei la rona informasaun sira ne’ebé fahe ba sira.
“Ita hanoin katak 7% ne’e ita bele lalais, maibé nufin ita la fasil atu koalia ho komunidade sira-ne’e. Dala ruma ita istoiri malu tan ho sira.
Ita hein tan suku seluk hanesan suku Vila Verde agora hetan ona karta atu sira mós bele halo deklarasaun, maibé ita sei halo uluk verifikasaun para ba oin sira tama ona iha kritéria atu deklara katak komunidade Suku Vila Verde livre husi Area La Soe Foer-Boot Arbiru (ALFA),” nia dehan.
Nia hatutan, Munisípiu Díli ne’e susar uitoan atu muda sira-nia hahalok sira-ne’e, tanba iha suku balun ne’ebé mak komunidade barak liu mak liga paralón sintina nian mai valeta. Tanba ne’e Saúde Munisipiu Díli halo ona planu atu oinsá bele tun ba ko'alia didi'ak ho komunidade sira-ne’e atu bele komprende liuhusi programa sira ne’e.
Nia hatutan, bainhira Munisipiu Díli mak konsegue deklara, entaun nasionál bele deklara, maibé Munisipiu Díli seidauk konsegue nasionál araska, tanba ne’e presiza tempu naruk atu muda konsiénsia komunidade nian, maibé di'ak tanba suku balun komesa koopera ona hodi deklara sira nia area ALFA.
“Suku sira-ne’e mak lakohi koopera ho saúde ida ne’e problema boot, tanba malnutrisaun kontinua aumenta, moras kulit, moras diaréia no moras seluk tan. Impaktu mai husi komunidade sira soe fo'er boot arbiru, lalar ba tuur no hodi mai tuur fali ba hahán sira ne’e, ida ne’e problema,” dehan Diretór Pinto.
Iha parte seluk, Reprezentante Prezidenti Autoridade Munisípiu Díli, Ramalho da Costa hateten, komunidade sira ne’ebé hela iha Díli ne’e obrigatóriu tenke iha sintina, la'ós hela tiha iha Díli, sintina la iha, soe fali fo'er boot iha valeta, ida-ne’e atitude ne’ebé la di'ak.
“Komunidade sira ne’ebé halo uma ne’e tenke halo kedas ho sintina, atu nune’e fo'er boot ne’e labele soe fali iha valeta laran, tanba ita soe fo'er boot arbiru de'it hanesan ne’e, ida-ne’e bele afeta ba ita-nia saúde rasik. Tanba ita moris iha aldeia ida, suku ida, liuliu iha kapitál Díli ne’e obrigatóriu uma-kain ida tenke iha sintina rasik,” nia dehan.
Nia hatutan, loos duni katak komunidade sira balun iha munisípiu Díli ne’e la iha sintina, tanba fatin ne’ebe sira hela ba ne’e la permite atu kee, tanba bainhira sira kee foin 50 senti, hetan ona bee. Ida ne’e mak difikulta sira labele kee sintina, maibé obrigatóriu tenke halo duni, atu nune’e fo'er boot ne’e labele soe fali iha valeta, tanba bele afeta ba saúde.
Nia mós alerta ba komunidade sira ne’ebé iha Díli, bainhira forma ona uma-kain tenke halo sintina, tanba liuhusi entidade hotu atu servisu hamutuk atu nune’e programa ALFA, bele implementa hotu iha suku (31) iha Munisipiu Díli.
Reprezentante Prezidenti Autoridade Munisípiu Díli, Ramalho da Costa la haluha agradese tebes ba suku 4 iha munisípiu Díli ne’ebé mak deklara ona katak sira la soe fo'er boot arbiru ka ALFA.