Domingo, Julho 14, 2024

Primeiru-Ministeriu (PM) Kay-Rala Xanana Gusmão husu grupu Lezeval atu promove kultura husi munisípiu hotu liuhusi atividade animasaun sira.

Primeiru-Ministeriu (PM) Kay-Rala Xanana Gusmão husu grupu Lezeval atu promove kultura husi munisípiu hotu liuhusi atividade animasaun sira.

Nia dehan, durante ne'e atividade animasaun husi grupu Lezeval sempre hola parte iha serimónia Nasional no Internasional sira, husi animasaun ne’ebé mak sira hetan reprezentasaun kona-ba kultura Timor-Leste nian.

"Ita haree husi animasaun ne’ebé sira iha, kontribui tebes ba promove ita-nia kultura tanba ne'e husu atu promove kultura kada munisípiu hotu labele husi munisípiu balun de’it," nia hatete.

Nia dehan, durante ne'e nia akompaña sira promove barak husi munisípiu Lautem nia kultura iha serimónia Nasionál tantu Internasional, tanba ne’e presiza reprezenta mós husi munisípiu seluk.

"Husu atu lezeval halo peskiza ba kultura kada munisípiu hodi promove ba mundu liuhusi serimónia sira ne’ebé mak sira sempre hola parte atu ema bele koñese didiak kona-ba ita-nia kultura," PM Xanana dehan.

Enkuantu nia dehan, dansa kultura ne'e mak eziste iha Timor-Leste mak tebe-tebe, suruboek, bidu, dansa kuu kafe, soru tais, halo natar no seluk tan, nos hirak ne'e tenke promove.

Alende ne'e, PM Xanana husu ba Ministériu Juventude Desportu Arte no Kultura tenke tau mós atensaun iha orsamentu ba atividade husi grupu animasaun kulturál sira.

Iha fatin hanesan, Reprezentante Grupu Kultural Lezeval, Domingas Silva, durante ne'e grupu kultura Lezeval hetan ona fiar husi governu hodi promove kultura iha nivel internasional liuhusi Festival Kultura Internasional Lusofonia iha Goa India.

"Durante ne'e ami prepara ami-nia dansa tradisionál iha sanulu, nune'e mos vestuáriu tradisionál kompostu husi munsipiu hotu iha teritoriu laran tomak no ami aprezenta iha serimónia nasionál nune'e mós internasionál sira," nia dehan.

Alende ne'e husi Grupu Kultura Lezeval agradese tebes, tanba durante ne'e mos sempre hetan apoiu husi governu hodi promove atividade dansa kulturál hodi kontribui ba promove Timor-Leste iha mundu nomós lori benefisiu ba Timor-Leste.