- Publika iha: 09 Outubro 2024
Prezidenti Autoridade Munisípiu (PAM) Viqueque Francisco Cruz Simões de Gonzaga Soares hateten, problema iha Munisípiu Viqueque ne’e mak estrada maioria sei aat, tanba ne’e garantia iha mandatu ne’e sei rezolve problema estrada.
“Munisípiu Viqueque nia problema ne’ebé boot liu mak estrada, tanba ita haree estrada aat husi kedas Aslaitula tama to’o Viqueque kota, tama iha aldeia sira-ne’e estrada kuaze aat hotu kedas, tanba ne’e iha ha’u-nia mandatu sei rezolve problema estrada,” dehan PAM-Viqueque iha serimonia komemorasaun masakre Kraras ba dala 41, iha Kraras,Viqueque.
Nia hatutan, problema estrada iha Munisípiu Viqueque iha villa haree ba sei di’ak oituan, maibé sai ba suku no aldeia sira aat liu, tanba ne’e iha mandatu ida ne’e sei rezolve problema estrada ne’e.
Iha fatina hanesan Veteranu Afonso Soares hateten, iha Viqueque ne’e estrada aat liu, hahú husi suku ba to’o iha aldeia no to’o postu, estrada rohan ida de’it mós la iha.
“Munisípiu Viqueque ne’e problema ba estrada ne’e la’ós iha suku no aldeia de’it mak aat, maibé tama to’o postu sira ne’ebá estrada pedasuk ida de’it mós la iha, ita sae karreta husi Viqueque ba Dili ne’e kareta tidin ita tama to’o Baucau mak para,” nia dehan.
Nia hatutan, problema estrada ne’e la’ós foin mak agora mak aat, hahú kedas Indonesia nia tempu kedas ona, estadu mai halo estrada iha de’it Viqueque villa laran, liu ida ne’e estrada la iha ona.
Iha fatin seluk, Komunidade Suku Uma-Kiik Olinda da Costa hateten, sira terus liu mak estrada, bai loron han rai rahun to’o moras, tempu udan la’o la di’ak tanba tahu.
“Ami hela iha ne’e terus liu ba estrada, ami atu lori de’it modo tahan ruma ba merkadu mós la di’ak, tanba de’it estrada aat, tempu udan entaun karreta labele tama mai, tanba udan boot rai tahu, maibé tempu bain loron fali, ami mak terus fali ba rai rahun,” nia haktur.
Nia mos husu ba governu atu tau netik matan ba sira-nia problema, tanba tinan barak ona sira terus de’it hanesan ne’e, labele hein tempu kampaña mak mai ko’alia hodi bosok de’it, manan tiha halo finji la rona tiha.