Relasiona ho feto isin rua barak mak lori motor,  Xefe Seksaun Karta Kondusaun DNTT Florentina Bento husu ba governu atu kria lei ida nune’e bele regula sira.Tuir Komandante Polisia Tranzito Nasional, PNTL, Superintendente Antonio L.C. Soares, katak nia parte labele bandu feto isin rua sira ne’ebe lori motor tanba laiha baze legal ida.


“Ami labele foti medidas no hola sansaun ba feto isin rua ne’ebe lori motor tanba lei la hateten. Ami servisu tuir lei se lei hatete hanesan ne’e ami bele implementa tuir maibe laiha entau ami labele halo buat ida,” dehan Komandante Soares, semana kotuk (30/01) iha nia knar fatin iha PNTL, Kaikoli, Dili.


Tuir nia, iha Kodigu du Trabalhu polisia tranzitu nian, laiha artigu ida atu regula inan-feton sira ne’ebe ho kondisaun isin rua maibe lori motor, maske hatene katak ida ne’e fo impaktu ba sira nia saude no ba bebe nia saude.
Nia dehan, Timor–Leste presiza duni atu kria lei ne’e atu proteze inan-feton sira ne’ebe ho kondisaun isin rua ne’ebe lori motor tanba bainhira sira lori motor bele fo impaktu ba sira nia bebe ho kondisaun estrada ne’ebe la favoravel.


Iha lidun seluk Xefe Seksaun Karta Kondusaun Diresaun Nasional Transporte e Terestres (DNTT), Florentina Bento hateten tuir esperensia ne’ebe sira hare iha nasaun seluk ema iha duni regulamentu ida atu bandu feto isin rua sira labele lori motor tanba bele fo inpaktu ba sira nia kondisaun saúde no sira nia bebe ne’ebe iha maibe Timor-Leste seidauk iha regulamentu ne’e.


“Timor –Leste presiza duni kria lei ne’e atu bele halo protesaun ba inan feto sira ne’ebe ho kondisaun isin rua utilize transporte hanesan motor hanesan ita hare iha nasaun seluk bandu feto isin rua sira lalori motor tanba bele fo inpaktu ba inan no bebe nia saúde,” dehan Xefi Bento.


Maske nune’e nia dehan, nudar ema umana ida iha konsensia rasik atu prevene aan husi kondisoens saida deit hanesan mos inan isin rua, doutor sira dehan labele lori no sae motor diak liu lalika tanba ne’e fo inpaktu ba sira nian kondisaun.
Entretantu Bemvinda da Silva, Komunidade e mos nudar inan ida husu ba inan isin rua sira ne’ebe ba-bain lori motor atu iha konsiensia rasik nune’e labele fo impaktu ba bebe no ba inan nia saude.


“Ba hau pesoal se parteira ka doutor sira dehan labele sae motor demais ne’e fo impaktu ba hau nia kondisaun saude no hau nia bebe, diak liu la’o deit ka sae kareta diak liu,” nia dehan.