- Publika iha: 08 Outubro 2020
Komissaun Reguladóra Arte Marsiais (CRAM) husu ba federasaun artemarsiais ne’ebé hamahan aan iha Confederasaun Desportu Timor-Leste (CDTL) atu halo kompleta dokumentus tanba politika CRAM nian hatete katak kada organizasaun ka federasaun artemarsiais tenke prense hotu kriteria 18.
Presidente CRAM, Octavío da Conceição, hateten federasasun lubuk ida mak seidauk submete sira nia dokumentus kompletu ba CRAM hanesan Shorinji Kempo, Taekwondo, Karate, Judo, Wushu, Muay Thai, Boxing, Aikido no seluk tan.
Nune’e nia apela ba federasaun sira mak seidauk prense hotu kriteria ne’ebé governu liuhusi SEJD no CRAM estipula ona bele halo ona atu nune’e governu fasili hodi kontrola sira aktividade.
“Ami husu ba federasaun sira hamahan aan iha CDTL atu atualiza fila fali sira nia dokumentus. Sira nia dokumentus iha sekretária CRAM maibe atu hatete dehan katak sira nia status sira uluk ne’e kaduka hotu ona ho revogasaun lei No. 8/2008 konaba arte-marsiais nian ne’ebé revoga ona ho lei No.5/2017,” salienta Presidente CRAM Conceição.
Hatutan Presidente CRAM katak, tanba diretiva refere públikadu ona iha jornal repúblika sai ona hanesan baze legal ida atu organizasaun arte-marsiais sira hotu-hotu bele kumpri lei ka regulamentu ne’ebé e governu ka estadu fo sai.
“Ami sei notifika sira iha tempu badak para depois sira hotu mai kompleta sira nia dokumentus durante fulan tolu nia laran. Hahu fulan outobro to dezembro sira bele kompleta sira nia dokumentus tuir kriteriu ne’ebé mak CRAM fo sai iha dia de juño 2020,” nia hateten.
Sorin seluk, Presidente CDTL Afranio Xavier Amaral, informa katak CRAM hanesan orgaun ida atu kontrola ba modalidade desportu hotu iha Timor-Leste, uluk federasaun 12 maibe agora federasaun hamutuk 32 ona.
“Ita kompleta dokumentus tuir artigu 11 dehan katak registu atletas, klubus e formasaun ba direjentes sira mak bolu registu ne’e. Registu para hetan legal nia ramun-ramun sira ne’e se mak responsabilita para fasilita kontrola husi governu kuandu akontese buat ruma, ID organizasaun nia naran tanba ida ne’e mak ita presisa toma atensaun ba asuntu ne’e,” nia haklean.