Terça, Janeiro 19, 2021
Total visitors: 543636

Diretora Organizasaun Movimentu Feto Foinsa’e Timor-Leste (MOFFE-TL), Yasinta Lujina hateten edukasaun sivika ba foinsa’e sira kona ba utilizasaun internet ne’ebe seguru no saúdavel importante tebes tanba media digital bele lori impaktu positivu, nune’e mos negativu ba ema, liu-liu foinsa’e sira nia moris.

Diretora Organizasaun Movimentu Feto Foinsa’e Timor-Leste (MOFFE-TL), Yasinta Lujina hateten edukasaun sivika ba foinsa’e sira kona ba utilizasaun internet ne’ebe seguru no saúdavel importante tebes.

Nia salienta, sira nia observasaun hare foinsa’e barak mak utiliza internet la saudavel, liu-liu halimar game online, insulta malu, lohi malu, no halo violensia, tanba realidade autoridade seguransa halo ona kapturasaun ba balun.

“Ita utiliza ho produtividade, tulun ita dezenvolve ita nia kapasidade personal, fo benefisiu ba servisu, estudu sira no relasaun sosial ne’ebe saudavel entre ema ida no ema seluk, laos nakonu ho violensia, insulta malu no buat ne’ebe destroi fali ita hanesan uza ba games online, ne’ebe gasta tempu barak halo sai baruk ten entaun la tulun joven sira sai produtivu,” nia hateten bainhira pratisipa iha kolokiu utiliza internet ho seguru no saudavel iha salaun Fundasaun Alola Maskarinhas, Dili.

Nia dehan, foinsa’e sira mak alvu principal tebes ba utilizasaun internet, liu-liu media sosial sira tanba ne’e sira tenke komprende no hatene benefisiu positive no negativu sira husi internet.

Entretantu, Eis Presidente da Republika, Jose Ramos Horta hateten plataforma sosial media ne’e iha vantajen, maibe problema ne’ebe mundu laos deit Timor-Leste hasoru mak ladun iha kreatividade jornalistiku ho imajen atu labele fo oportunidade ba ema iresponsabilidade sira lansa lia falsu.

“Plataforma media sosial ne’e importante ba ita hotu iha mundu, liu-liu fasilita komunikasaun. Ezemplu uluk jornalista estranjeiru ruma hakerek buat ruma arbiru halo Timornia naran ladiak, hau hakerek ba sira no tenta publika, maibe agora hau hau la liga, hau fo resposta ba sira liu husi hau nia pajina facebook ne’ebe dala ruma ema lee liu fali nia jornal,” nia hateten.

Iha parte seluk, Sekretario Estado Komunikasaun Sosial, Mericio Juvinal dos Reis hateten kestaun media digital agora sai debate iha mundu atu bele konsiensializa sidadaun sira uza media ida ne’e ho saúdavel no responsabilidade.

Nia dehan, governu iha estratejia rua atu promove utilizasaun interne saúdavel no seguru mak kria lei prevene no rezolve problema no edukasaun sivika atu prepara sidadaun sira utiliza internet ho responsabilidade.

“Governu nia posisaun mak ita sei la taka no la blok plataforma media sosial sira hanesan facebook. Ita prefere prepara sidadaun sira tama iha kultura plataforma digital liu husi edukasaun sivika,” nia hateten.

Nia dehan, sosiedade sivil iha papel importante tebes atu halao edukasaun sivika no governu prontu apoia programa edukasaun sivika promove internet saúdavel no kombate hoax ou lia falsu.

E-mail Subscription

Enter your email address:

Follow us on Twitter

  • House Banner Side Bar 02
  • House Add Side Banner 04