Governo Identifika Ona Kursu 4 Hodi Inklui Benefisiario Bolsa Hakbit

Governo liu husi Ministerio Ensinu Superior Siensia no Kultura (MESSK) identifika ona kursu 4 inklui Saude, Agrikultura, Turismu no Engenharia Sivil hodi inklui estudante benefisiario bolsa hakbit atu bele aprende tanba area hirak bele tulun sira asesu ba kampo de trabalho.

Ministro MESSK, Longuinhos do Santos hateten, estudante sira ne’ebe mak asesu ba bolsa hakbit ne’e kbik laek ona no liu husi bolsa ne’e atu hakbit sira hodi hetan buat ruma hodi sustenta sira nia futuru.

“Atu hakbit benefisiario sira ne’e mak governo ita identifika ona kursu 4 ne’ebe mak kontribui tebes ba kampo de serviso,” nia hateten.

Nia dehan, area 4 ne’e identfika ona iha ensinu superior publiku no privado sira hotu atu bele inklui estudante bolsa hakbit sira iha kursu refere.

“Kursu 4 ne’e ita hare benefisio no nesesita tebes iha nasaun ida ne’e tanba ne’e ita ekoraja tebes ita nia alin estudante sira, kuando remata sira nia estudo sira bele emprega sira nia an no loke kampo de trabalho hodi emprega ema seluk,” nia informa.

Enkuanto total benefisiario ba bolsa hakbit hamutuk nain 910 husi ne’e fahe ba ensinu superior publiku Universidade Nasional Timor-Lorosa’e (UNTL) no Instituto Politekniku Betano (IPB) simu 500, no nain 410 koloka ba ensinu superior privado, husi numero total ne’e rekruta kada munisipio benefisiario kbit laek nain 50.

Iha fatin hanesan, Reitor Universidade Dili (UNDIL), Jose Belo hateten, husi parte governo iha ona kontakto ba ensinu superior publiku no privado ne’ebe mak akreditado ona sei oferese espasu ba estudante bolsa hakbit sira atu bele aprende tuir fakuldade ne’ebe mak prioridade.

“Ita iha UNDL oferese konaba saude nian liu-liu konaba dentaria nian no infermagem. Konaba fasilidade husi fakuldade rua ne’e husi universidade la iha duvida tanba kompleto hodi fasilita estudante sira estuda,” nia informa.
Enkuanto konaba total estudante bolsa hakbit sira ne’ebe mak atu tama iha UNDIL husi parte Universidade seidauk simu dados lolos.