Sábado, Junho 19, 2021

Lideransa husi grupu arte marsiais Ikatan Keluarga Silat Kera sati (IKS) no arte ritual 77 husu ba membru sira atu hapara violensia entre grupu no kria paz estabilidade iha rai doben Timor-Leste.

Lideransa husi grupu arte marsiais Ikatan Keluarga Silat Kera sati (IKS) no arte ritual 77 husu ba membru sira atu hapara violensia entre grupu no kria paz estabilidade iha rai doben Timor-Leste.

Presidente IKS, Silvester Sufa hateten, hanesan lideransa ba organizasaun IKS la autoriza membru sira atu halo aktu violensia hasoru grupu ka institutu, tanba iha estatutu iha nia regimentu konaba regras organizasaun nian.

“Ita nia rezimentu la iha artigu ida konaba membru sira tenke halo violensia, no filosofia arte marsiais hateten labele halo torturasaun hasoru ema seluk, karik ida ne’e akontese ita intrega ba ita nia seguransa Polisia Nasional Timor-Leste (PNTL) hodi prosesu tuir lei,” nia dehan.

Nia dehan, organizasaun rasik iha regulamentu ka dutrina hodi regula no fo sansaun ba membru sira bainhira halo violensia maibe dadaun ne’e lideransa sira labele aplika ida ne’e tanba lei arma branka numeru 5/2017 la autoriza no bandu total.

“Tanba ne’e membru sira halo krime ita intrega ba polisia nune’e ida-idak bele responsabilidade ba nia aktu krime ne’e rasik,” Prezidente IKS Sufa saliente.

Aliende ida ne’e nia dehan, organizasaun mos la fase liman ba membru hirak ne’ebe mak halo asaun krime, no dadaun ne'e lider sira hasoru SEJD hodi apela ba membru sira atu hapara ona aktu krime, apela mos ba kordenador ranking sira atu apela ba membru ida-idak hodi bele tur hakmatek iha fatin.

Entretantu, Lideransa Grupo 77, Abilio Soares apela ba juventude loriku aswain, no membru organizasaun arte ritual 77 iha Timor laran tomak, espesial ba hirak ne'ebe hela iha kapital Dili, relasiona ho aktus konfrontuasaun ne'ebe akontese violensia no lori konsekuensia negativa barak.

“Lori ita nian uma ahi no be’e ami lideransa apela ba membrus organizasaun arte rituais no kultural 77 halakon no hakribi violensia no diskriminasaun hodi kontribui no hametin dame no hakmatek iha idak idak nian bairu, no hela fatin,” nia hateten.

Alende ne’e, nia haktuir, nafatin kuda esperitu unidade nasional, no hado’ok an hosi violensia, tanba violensia no violensia haosru malu ne’e krime, no krime ne’e individual mak sei responsabilia, no la’os kulpa organizasaun nian.

Iha parte seluk, Sekretariu Estadu Juventude no Desportu (SEJD), Abrao Nokosiku Saldanha hateten, dadaun ne’e husi parte grupu arte marsiais rua ne’e hasoru ona governu oinsa hodi buka solusaun iha futuru.

“Liga ba kazu krime entre grupu arte marsiais rua ne’e lori ona tribunal desizaun hotu ita hein husi tribunal mak deside no hau apela no ba sira atu konsola membru sira nune’e labele problema,” SEJD Nokosiku dehan.

Nia dehan, solusaun ne’ebe mak husi parte governu no lideransa grupu arte marsiais sira presija hare hamutuk mak oinsa dalan atu sai husi konflitu entre artis marsiais ne’ebe mak tinan barak ona akontese.

“Ita sei hari fali legislasaun ida propria husi intrese estadu no publiku nian hodi regulariza aktividade arte marsiais nian,” nia informa iha SEJD.

Tanba ne’e nia dehan, mobilizasaun konfrontu entre grupu arte marsiais IKS no arte ritual 77 foin lalais ne’e governu preokupa tebes tanba sira la kria unidade maibe ses kotuk ba malu hodi kria instabilidade iha komunidade liu-liu iha situasaun ne’ebe serka sanitaria, ne’e hahalok ne’ebe mak la diak no governu apela ona ba lideransa sira hodi kontrola nia membru selae taka grupu sira refere.

E-mail Subscription

Enter your email address:

Follow us on Twitter

  • House Banner Side Bar 02
  • House Add Side Banner 04