Quinta, Setembro 23, 2021
Total visitors: 578526

Ministerio Solidaridade Sosial no Inkluzaun (MSSI) servisu hamutuk ho agensia UNICEF dezenvolve plataforma online hodi haforsa rede prestasaun servisu sosial no protesaun ba labarik iha situasaun emergensia liga ho surtu Covid-19.

Ministerio Solidaridade Sosial no Inkluzaun (MSSI) servisu hamutuk ho agensia UNICEF dezenvolve plataforma online hodi haforsa rede prestasaun servisu sosial no protesaun ba labarik iha situasaun emergensia liga ho surtu Covid-19.

Diretur Jeral, iha Ministerio Solidaridade Sosial no Inkluzaun, Rui Manuel Exporto hateten plataforma ne’e kompleta ho informasaun oioin no formatu sira atu bele fasilita servisu protesaun ba labarik sira tanba situasaun agora liga ho propagasaun surtu Covid-19 hamosu limitasaun ba movimentu sira.

“Plataforma ne’e nudar armajen ba rekursu oioin ne’ebe sei apoia official servisu sosial no protesaun labarik sira atu halo servisu asistensia ne’ebe diak liu tan ba labarik sira iha rai laran,” nia hateten bainhira partisipa iha serimonia lansamentu plataforma online Covid-19 protesaun ba labarik iha salaun Kofi Anan kampaun UN, Kaikoli, Dili.

Nia dehan tinan ne’e 2021, sira servisu hamutuk ho UNICEF dezenvolve hela sistema jestaun informasaun no kazu atu bele fornese dadus ne’ebe adequadu ba governu halo asaun hodi responde ba dezafiu sira ne’ebe hasoru relasional ho servisu protesaun ba labarik sira tanba durante ne’e dadus sai problema.

Entretantu, Komisaria Komisaun Direitu Labarik, Dinorah Granadeiro hateten sira servisu hamutuk ho parseiru sira estabelese fatin amigavel ba labarik sira iha sentru evakuasaun atu kria atividade oioin hodi anima labarik sira iha situasaun difisil.

“Ita hamutuk ho UNICEF no parseiru sira estabelese fatin amigavel iha kada sentru evakuasaun sira atu anima labarik sira no ajuda sira iha sira nia situasaun difisil, hanesan situasuan Covid-19 sira la asesu ba edukasaun, fati hotu la livre ba sira atu halimar. No aumenta tan ho akontese inundasaun limita sira nia movimentu tanba ne’e maka ita kria sentru ne’e hodi apoia sira,” nia hateten

Nia dehan sira sei iha diskusaun atu haluan inisativa sentru amigavel ne’e ba to’o iha komunidade atu bele anima no apoia labarik sira hasoru situasaun difisil, liu husi atividade oioin hansan jogu, kanta, aprende hamutuk no seluk tan.

Iha parte seluk, Adjuntu Reprejentante UNICEF, iha Timor-Leste, Scott Whoolery hateten plataforma ne’e fasilita informasaun ne’ebe diak liu tan ba ekipa sira ne’ebe servisu ba protesaun labarik nian iha teritorio tomak inklui mos publiku sira konaba direitu labarik sira nian no risku ne’ebe labarik sira hasoru atu ema hotu hamutuk fo protesaun ba labarik sira iha situasaun difisil.

“Plataforma ida ne’e hanesan atividade ki’ik oan ida husi servisu inisiativa lubun ne’ebe UNICEF halo hodi hametin sistema servisu protesaun labarik nian iha Timor-Leste. No ita espera katak plataforma ne’e bele hametin liu tan inisiativa seluk ne’ebe iha hodi meilhora servisu prestasaun ba familia no moris diak labarik nian,” nia hateten.

E-mail Subscription

Enter your email address:

Follow us on Twitter

  • House Banner Side Bar 02
  • House Add Side Banner 04