Domingo, Outubro 17, 2021
Total visitors: 584029

Diretur Executivu Forum NGO Timor-Leste (FONGTIL), Daniel Santos do Carmo husu profesional saúde sira fo tratamentu ne’ebe espesifiku no amigavel ba labarik sira ne’ebe konfirmadu positivu Covid-19 tanba dadus hatudu kazu iha munisipiu Ermera 73% idade minoridade entre tinan 10 to’o 19.

Diretur Executivu Forum NGO Timor-Leste (FONGTIL), Daniel Santos do Carmo husu profesional saúde sira fo tratamentu ne’ebe espesifiku no amigavel ba labarik sira ne’ebe konfirmadu positivu Covid-19.

Nia dehan familia sira ne’ebe oan konfirmadu positivu Covid-19 tenke kopera ho profesional saúde sira hodi tau matan ba oan sira tanba labarik sira iha kondisaun mental ne’ebe sensitive presiza atensaun.

“Ita nia rekomendasaun maka pesoal saúde sira atu tau atensaun no tratamentu espesial ba pasiente Covid-19 ho idade minoridade. Loos duni katak familia sira labele tuir tanba pasiente positivu ho sintomas, entau tenke hetan atendimentu husi pesoal saúde sira laos familia sira tuir,” nia hateten liu husi konferensia imprensa iha salaun FONGTIL Kaikoli, Dili.

Nia hateten FONGTIL kondena makas aktu violensia ne’ebe komunidade no familia pasiente sira halo hasoru profesional saúde sira iha fatin barak, inklui kazu ida iha loron 1 fulan Agostu tinan 2021, familia pasiente baku diretur servisu saúde munisipio Ermera tanba deside transfere pasiente minoridade ida mai iha izolamentu tasi tolu, Dili.

Iha oportunidade ne’e nia husu autoridade polisia atu loke investigasaun ba kazu agresaun fisiku hasoru pesoal saúde sira atu autor sira bele responsabiliza ba sira nai hahalok no nafatin asegura seguransa ba pesoal saúde sira ne’ebe halao hela servisu prevensaun no mitigasaun surtu Covid-19 iha teritorio nasional.

Iha parte seluk, Diretur Servisu Saúde munisipio Ermera, Antonio de Fatima hateten kapasidade izolamentu Gleno bele akumula pasiente nain 100, maibe semana ida ikus ne’e numeru kazu foun aumenta makas to’o 400 resin tanba ne’e tenke transfere mai iha nasional.

“Durante ne’e ami iha kazu 53 deit, entau hela sira nain 28 maka tama swab repetidu, ne’ebe iha tempu badak sira sei fila hotu ona. Maibe iha semana kotuk ne’e ami nia kazu sa’e makas, entau hodiseik dader ami transfere nain 21 no lokraik nain 58 husi postu administrative Railaku mai izolamentu tasi tolu,” nia hateten.

Nia dehan tratamentu ne’ebe sira fo hanesan ba kazu asintomatiku sira fo vitamina no aihan ne’ebe iha valor nutriente, no kazu sira sintomatiku tratamentu tuir nesesidade ba moras ambulatoriu sira.

Nia hateten munisipiu Ermera tama ona faze transmisaun komunitaria, entau sira simu orientasaun husi ministerio da saúde no Sentru Integradu Jestaun Krize atu la autoriza sidadaun sira halo autoizolamentu tanba maioria kondisaun uma la prense kriteria.

Nia informa kazu agresaun fisiku husi familia hasoru nia, rejista ona iha eskuadra polisia munisipio Ermera atu halo investigasaun.

E-mail Subscription

Enter your email address:

Follow us on Twitter

  • House Banner Side Bar 02
  • House Add Side Banner 04