Domingo, Outubro 17, 2021
Total visitors: 584029

Ministra da Saúde, Doutora Odete Maria Freitas Belo hateten governu deside ona atu introdus vasina pfrizer ba labarik sira ho idade tinan 12 ate 17, no bazea ba dadus labarik ne’ebe elejivel simu vasina Covid-19 hamutuk nain 150,000.

Ministra da Saúde, Doutora Odete Maria Freitas Belo hateten governu deside ona atu introdus vasina pfrizer ba labarik sira ho idade tinan 12 ate 17.

Nia dehan sira husu ona Covax facility atu halo balansu ba apoia 20% ho vasina pfrizer tanba Timor-Leste kontinua hetan doasaun vasina AstraZeneca ho kuantidade ne’ebe bo’ot husi governu Australia atu kobre populasaun adulto.

“Ita iha 150,000 labarik ne’ebe tenke simu vasina. Ita simu uluk husi Covax facility hamutuk 100,620 dose, ne’ebe ita sei administra uluk ba labarik 40 ate 50 mil atu fo portunidade ba dose daruak tanba ita seidauk iha serteja ba kompras vasina ida ne’e,” nia hateten fahoin halo enkontru preparasaun ba introdusaun vasina Pfrizer ba labarik idade tinan 12 ate 17 iha Timor-Leste, iha salaun MSSI Kaikoli, Dili.

Nia dehan vasina ne’e tenke tau iha tempratura ne’ebe malirin liu tanba ne’e presiza preparasaun ne’ebe diak atu simu, armajena no administra vasina ne’e ho diak hodi fo benefisiu ba labarik sira.

Nia hateten governu Australia liu husi DFAT mos apoia fundus ho montante 8.1 miloens dollar Australia ba UNICEF atu halo kompras mos ba vasina Covid-19 tanba ne’e sei fo prioridade ba kompras vasina pfrizer ba labarik sira.

Nia hatutan governu mos tau orsamentu atu sosa vasina ba sidadaun adulto no labarik sira, maibe sei hare no kapitaliza apoia sira husi parseiru dezenvolvimentu sira hodi asegura fo duni benefisio ba povu.

Iha oportunidade ne’e nia dehan kampanha vasina ba ema adulto lao intensifika liu tan iha munsipio sira, liu-liu munisipiu frontera atu bele prevene propagasaun variante Covid-19.

Iha parte seluk, Diretor Executivu Forum NGO Timor-Leste (FONGTIL), Daniel Santos do Carmo hateten rezultado monitorizasaun hatudu kampanha sensibilizasaun ba komunidade konaba vasina sei menus tebes, liu-liu iha area rural tanba ne’e komunidade barak sei rejeita simu vasina.

Nia dehan munisipio ne’ebe kobertura vasian a’as maka Dili, Viqueque no Covalima, maibe munsipiu seluk kobertura ki’ik tebes inklui Bobonaro no RAEOA.

“Ita detekta katak edukasaun konsensializasaun kampanha husi pesoal saúde sira seidauk maximu iha munsipiu sira ne’ebe sai prioridade atu enkoraja ema simu vasina maioria,” nia hateten.

Nia hateten governu tenke aselera vasina ba minoridade sira no kria kondisaun logistika ne’ebe apropriadu iha fasilidade saúde sira hodi armajena vasina sira atu fo duni benefisiu ba povu.

E-mail Subscription

Enter your email address:

Follow us on Twitter

  • House Banner Side Bar 02
  • House Add Side Banner 04