- Publika iha: 09 Agosto 2021
Grupu Aliansa Labarik no Feto husu Parlamentu Nasional (PN) aselera no fo pareser lalais ba lei protesaun labarik hodi hetan aprovasaun.
Diretor Plan Internasional iha Timor-Leste Diliana Ximenes hateten, lei protesaun labarik ne'e halo ona audiensia publika no iha ona prioridade atu bele hetan aprovasaun husi Parlamentu Nasional.
"Liu husi audiensia ne'ebe ita halo ho Komisaun F ne'ebe trata asuntu saude no seguransa sosial no igualidade jeneru iha Parlamentu Nasional ami husu atu bele aselera no fo pareser lalais hodi aprova lei protesaun labarik," nia dehan.
Nia dehan, lei ne'e tenke aprova lalais nune'e bela implementa hodi fo protesaun ba direitu labarik sira nian, tanba durante ne'e la iha lei hodi proteze labarik sira, nune'e mos husi lei refere bele fo sansaun ba ema ne'ebe halo violensia hasoru labarik sira.
Iha fatin hanesan, Prezidente Komisaun F iha Parlamentu Nasional Trata Asuntu Saude Seguransa Sosial no Igualidade Jeneru, Deputado Noe da Silva Ximenes "Buka Tuir" hateten konaba lei protesaun labarik oras ne'e dadaun iha ona fase analize.
"Retaloriu pareser konaba lei ne'e ita sei lori ba Uma Fukun Parlamentu Nasional no deputadu sira hotu analiza hamutuk hodi halo aprovasaun," nia hateten iha PN.
Nia dehan, konaba lei refere marka ona audensia iha fulan agostu nune'e hodi halo aprovasaun pareser ba Parlamentu Nasional hodi tau iha diskusaun jeneralidade
"Konaba parte tekniku nian ita finaliza hotu ona, hein 12 de agusto aprezenta ba Prezidente Parlamentu Nasional no Deputadu sira hodi halo aprovasaun," nia salienta.