- Publika iha: 30 Janeiro 2013
Durante loron bo’ot Natal no tinan foun kazu asidente trafiku rejistu maka’as iha Banku Urgensia Ospital Nasional Guido Valadares (HNGV) hamutuk pasiente 106 e husi numeru ne’e nain ida mate tanba hetan pankadas todan.“Hahu iha 24 Dezembru 2012 to’o dia 2 Janeiru 2013 ami simu pasiente husi asidente kareta hamutuk ema nain 34, motorizada hamutuk 72, husi sira ne’e balu tohar, kanek kmaan to’o baixa iha ospital iha feto ida mak ami la konsege salva nia vida tanba hetan pankadas todan,” informa Xefe Departementu Banku Urgensia, Emfermeiru Americo dos Santos, (07/01), iha Bidau Toko Baru, Dili.
Alende ne’e Banku Urgensia mos simu pasiente ne’ebe tenta atu hemu veneno hamutuk ema nain 11 (33 anos mai kraik) inklui mos kazu ema mout iha tasi no koko tara an nain ida. Sira hirak ne’e konsege rekopera fali sira nia saude.
Bazea ba informasaun ne’ebe parte ospital hetan husi sira nia familia katak,problema hirak ne’e akontese tanba lanu, falta kontrola ba transporte inklui mos problema uma laran.
Iha parte seluk Manuel Sales nudar Komunidade, rekonese katak kada tinan iha loron bo’ot sempre akontese asidente trafiku ne’ebe rezulta ema bele mate.
“Barak liu mak foinsa’e sira tanba sira hemu tua lanu tiha halai motor no kareta tuir sira nia hakarak la kontrola velosidade, entaun bele rezulta ema seluk mate tanba ne’e iha loron sira hanesan ne’e Polisia tenke kontrola makas atu labele prejudika fali ema seluk nia vida,” dehan Komunidade ne’e.