- Publika iha: 19 Abril 2022
Kandidatu Prezidente periodu 2022-2027, Jose Ramos Horta ho Fransisco Guterres Lu-Olo, salienta katak se karik manan eleisaun, prontu kria kampu de servisu ba joventude Timoroan sira, tanto iha rai laran no rai liur.
Kandidato Prezidente Jose Ramos dehan, bainhira nia eleitu nia sei kria politika ida hodi halo dialogo ho governu nune'ebe bele rezolve problema dezemprego liu-liu ba joven sira iha Timor-Leste.
"Ita sei halo dialogo ho governu hodi kria formasaun profesional ba joven sira no involve sira iha kampu servisu iha rai laran nune'e mos estrangerio," Ramos Horta hateten iha sentru votasaun Sede Suku Metiaut.
Nia dehan, sei kopera ho nasaun estrangerio sira ne'ebe mak presija trabalhador, nune'e bele faailita joven sira ba servisu.
"Hanesan uluk, hau pesoal halo koperasaun ho governo Corea do Sul hodi fasilita ita nia joven sira ba servisu iha Corea do Sul to'o ohin loron," nia informa.
Nia salienta intensaun mak atu bele reduz numeru dezemprego iha Timor-Leste.
Iha parte seluk, Kandidato Prezidente, Fransisco Guterres Lu-Olo, hateten kria kampu de trabalho ba joven sira ne'e importante tebes duranate mandanto akutal Presidente da Republika nian.
"Ita tenke kria kampu de trabalho ba joventude sira nune'e sira bele prepara futuru ne'ebe diak, tanba sira mak jerasaun kuntinuador," Lu-Olo informa iha sentro votasaun, Eskola Primaria Farol.
Tanba ne'e, nia haktuir se deit mak povu fo fiar hodi lidera Estado no Povu, tenki kria kondisaun ba povu no kria kampu de trabalho.
Entretanto, joventude Pascoal de Jesus Resureição hateten, ba se deit mak eleitu, tenki sai Prezidente ba Povu tomak.
"Maibe hanesan joven ami husu tenke fo prioridade liu hadia joven nia moris liu-liu kria kampu de trabalho mai ami joven sira," nia hateten.
Nia dehan alende kria kampu de trabalho, tenke fo prioridade ba area edukasaun, nune'e hodi tulun Povu nian oan sira asesu ba edukasaun, nune'e mos tenke kria politika diak liu-liu iha area saude liu-liu konaba atendimento pasiente sira.