CNE La Tolera Partidu Polítiku Mobiliza Labarik Partisipa Kampaña

Prezidente Komisaun Nasionál Eleisaun (CNE), José Agostinho da Costa Belo hateten sira la tolera sei halo notifikasaun ba partido polítiku sira-ne’ebé mobiliza labarik sira partisipa iha kampaña polítika tanba lei bandu labarik idade menus tinan 17 envolve iha atividade polítika.

Nia dehan iha kestaun rua ne’ebé tenke konsidera inan-aman sira lori labarik ba tuir kampaña tanba situasaun ruma obriga. Maibé la iha razaun ba partidu polítiku sira mobiliza labarik partisipa iha kampaña.

“Iha lei dehan labarik labele tuir kampaña, organizasaun sira-ne’ebé luta ba ida ne’e mós iha hela no ita mós konsente labele uza labarik. So que motivu lori labarik ne’e la’ós mai kampaña, maibé ita-nia fatin fasilidade laiha atu ema tau hela sira-nia oan sira-ne’e ho situasaun sira agora ita haree ameasa mós barak katak ema naok labarik.

Labarik sira halimar ba fali tasi ibun barak mós sai vítima tanba ne’e kestaun sira ne’e ita haree dehan katak la’ós lori labarik ba kampaña, maibé lori labarik tanba kauza situasaun ida-ne’ebé ita tenke haree didi’ak labele jeneraliza ida-ne’e lori labarik ba kampaña sira tenke lori tanba laiha ema haree iha uma,” nia hateten iha edifisiu CNE Colmera, Díli.

Nia hateten partidu polítiku sira-ne’ebé justifika intensaun mobiliza labarik mak sei notifika sira tuir lei ne’ebé vigora, maibé inan-aman lori oan tanba situasaun obriga sira lori.

Iha parte seluk, Diretora Organizasaun Movimentu Feto Foinsa’e Timor-Leste (MOFFE-TL), Yasinta Lujinha hateten envolvimentu labarik iha atividade kampaña eleitorál ne’e kontra direitu labarik nian no tau labarik iha risku tanba ne’e importante mós fó edukasaun ba inan-aman sira atu toma responsabilidade proteje labarik sira.

“Envolve labarik iha kampaña eleitorál ne’e kontra direitu labarik nian, labarik seidauk hatene no seidauk bele envolve iha polítika. Dalaruma ida-ne’ebé fó hatais labarik sira roupa partidu ne’e ita husu labele, labarik sira-ne’ebé pinta isin lolon no kaer bandeira partidu,” nia hateten.

Nia hateten sira rede protesaun direitu labarik halo ona karta ba CNE no partidu partidu polítiku sira atu toma responsabilidade proteje labarik sira iha períodu kampaña, liuhusi labele mobiliza labarik sira husi fatin ida ba tuir kampaña eleitorál.