- Publika iha: 19 Setembro 2023
Sekretáriu Estadu ba Formasaun Profesional no Empregu (SEFOPE), Rogério Araújo Mendonça informa joven na’in hitu kompostu husi mane na’in tolu no feto na’in haat aranka ba Japaun hodi hala’o estájiu tékniku iha empreza Kochi Agro Farm, ne’ebé nu’udar produtór bo’ot ba produtu agrikola oioin hanesan ailia, tomate, pipinu inklui aifunan.
Nia dehan sira-na’in hitu ne’e ekipa dahuluk ba halo estájiu profesionál, espera sira bele hatudu sira-nia disiplina no vontade servisu ne’ebé di’ak atu atrai empreza barak liutan kontratu joven barak ba servisu iha Japaun.
“Ba oin ita hatene ona katak merkadu traballu iha, automatikamente governu tenke kria sentru formasaun atu prepara joven sira responde ba merkadu,” nia hateten.
Nia hateten dadaun ne’e iha de’it sentru formasaun haat mak fó formasaun ba joven sira kona-ba língua Japaun nian, mak sentru formasaun Quesadhip Ruak, sentru St Rafael Bebonuk, sentru Ian Man Christen Asosiation (IMCA), iha munisípiu Díli, sentru formasaun Mira Seto munisípiu Covalima.
Entretantu, Rosalina da Costa, husi Baucau, agradese ba governu Timor-Japaun no empreza Kochi Agro Farm tanba fóona oportunidade ba sira atu halo estájiu iha Japaun.
“Ami hakat ba Japaun la’ós traballadór, maibé ami hanesan estajiáriu. No ida-ne’e primeira vez, entaun ami sei halo servisu ho di’ak no hatudu komportamentu ne’ebé di’ak atu loke oportunidade ba aileba oan sira seluk,” nia hateten.
Nia konsiente la’ós fasil atu servisu iha ema nia rain, tanba diferensia kultura no kostume, maibé sei esforsu aan atu adapta ho situasaun no husu governu atu apoia no akompaña nafatin sira.
Nia informa sira-na’in hitu ne’e sei ba estájiu iha produsaun ailia, tomante, pipinu no aifunan
Iha parte seluk, Embaxadór Japaun ba Timor-Leste, Tetsuya KIMURA hateten partisipasaun joven timoroan sira iha programa estájiu tékniku Japaun nian sei fó vantajen makas tantu ba Japaun no ba Timor-Leste, tanba Japaun nia sosiedade ferik-katuas mak bo’ot no Timor nia proposaun joven mak bo’ot.
“Ha’u hein katak grupu estajiáriu dahuluk ida-ne’e sei bele konklui programa ida-ne’e ho susesu, atu nune’e bele loke dalan ba estajiáriu sira seluk tuir mai no provinsia sira seluk sei simu estajiáriu sira iha sira-nia indústria,” nia hateten.
Embaxador fiar joven sira iha esperansa bo’ot ba oportunidade ne’e atu aprende abilidade agrikola, liu-liu kultivasaun modo no aifunan iha Japaun no sei kontribui ba dezenvolve setór agrikola iha Timor-Leste, bainhira fila tanba Kochi provinsia ida ne’ebé avansadu tebes iha Japaun ba área agrikola nian.