Segunda, Junho 24, 2024
Total visitors: 766366

Prezidente Repúblika (PR), José Ramos Horta konsidera problema númeru 1 iha Timor-Leste, mak agrikultura, seguransa alimentár, nutrisaun, tanba ne’e husu ba Primeiru-Ministru (PM) tau osan ba hodi rezolve problema ne’e.

Prezidente Repúblika (PR), José Ramos Horta konsidera problema númeru 1 iha Timor-Leste, mak agrikultura, seguransa alimentár, nutrisaun.

Nia hateten problema hotu importante, maibé problema agrikultura, seguransa alimentár, nutrisaun, saneamentu, bee mós, ida-ne’e importante liu.

“Klaru Primeiru-Ministru no governu haree prioridade barak, hanesan estrada rurál, bee moos, edukasaun, saúde, maibé labele iha prioridade ne'ebé boot liu fali agrikultura no seguransa alimentár, buat hotu bele prioridade, maibé labele iha ida mak bele boot liu fali, agrikultura, bee mós, saneamentu,” PR Horta hateten hafoin halo lansamentu ba projetu inovativu USAID Avansa Sistema Ai-han no Nutrisaun (SAN), iha salaun Suai, Timor Plaza, Díli.

PR apela ba PM Xanana Gusmão atu tau fali osan ba iha agrikultura, seguransa alimentár, nutrisaun, bee mós, saneamentu, tanba sira ne’e ligasaun ho saúde.

Nia dehan durante halo lansamentu refere oinsá atu bele dezenvolve agrikultura rurál, atu bele hetan hahán ne’ebé iha kualidade.

Iha fatin hanesan Enkaregadu Negósiu husi Embaxada Estadu Unidos America (EUA), Marc Weinstock hateten, avansa SAN sei prátika agrikultura ne’ebé adapta ho klima, diversifikasaun ai-horis, apoia ba empreza ki’ik sira no agroalimentar sira, iha nivel komunidade kona-ba ai-han no advokasia ba hahalok saudavel hodi hadi'a nutrisaun ba ema hotu iha Timor-Leste.

“Atividade avansa SAN ne’e, lansa iha tempu permanente, tanba hanesan kontinuasaun husi investimentu anteriór Estadus Unidos nian iha setór agrikultura inklui tan aspetu balun atu fó importánsia urjénsia ba kombate malnutrisaun, espesialmente ba inan feto no labarik ho tinan lima mai karik,” dehan nia.

Nia hateten, ho fokus atu hasa'e padraun nutrisaun no hadi'a seguransa ai-han, avansa SAN reflete objetivu dezenvolvimentu nasaun Timor-Leste nian.

Nia salienta tan katak Estadus Unidus sei kontinua koolabora ho governu Timor-Leste iha nivel nasionál no lokál, atu aselera fortalesimentu sistema ai-han lokál.