- Publika iha: 22 Outubro 2024
Ministeriu Saúde hamutuk ho Organizasaun Mundial Saúde (OMS) halo inaugurasaun ba Prostate-Specific Antigen (PSA) Oxygen Plant ne’ebé oferese husi OMS ba Hospital Nacional Guido Valadares (HNGV).
“Inaugurasaun PSA Oxygen Plant, konjuntu ho estadu arte nian ba Unidade Alta Dependénsia no ekipamentu Unidade Kuidadu Intensivu, reprezenta avansu bo’ot ba iha ita-nia kapasidade atu nune’e bele hadia kuidadu pasiente sira-nia saúde di’ak liutan,” dehan Ministra Saúde Elia dos Reis iha Inagurasaun PSA Oxygen Plant, iha HNGV, Díli.
Nia dehan, PSA Oxygen Plant ne’e sei bele asegura estavel, fornesimentu fiavel husi medika oxigenia, ne’ebé krusial ba iha tratamentu pasiente ho kondisaun respiratóriu di’ak liutan.
“Fasilidade PSA Oxygen Plant ne’e la’ós atu mellora pasiente sira-nia rezultadu, maibé mós atu reforsa signifikamente ita-nia abilidade atu responde ba emerjénsia no maneja komplexu ba kazu hirak ne’ebé ho maior efesiensia no seguru,” nia esplika.
Ministra dehan, agradese ba OMS, tanba bele ajuda nafatin no haforsa Sistema Saúde iha Timor-Leste.
Iha fatin hanesan, Diretora Rejional OMS Sudeste Aziátiku Ms. Saima Wezed hateten, Oksigenu mak ai-moruk ida-ne'ebé la gastu osan hodi sosa maské la iha alternativa atu salva moris, maibé Oxygen bele ajuda pasiente sira bainhira moras makaas.
“Oxygen ne’e ita la gastus orsamentu ne’ebé boot,maibé nia bele ajuda pasiente sira iha tempu difisil, ita haree durante pandemia ne'e família sira koko atu asegura oksijeniu ba sira-nia ema ne'ebé sira hadomi ida-ne’e sai hanesan ezemplu idaba ita.
Tanba ne’e ho apoiu husi OMS no iha kolaborasaun besik ho governu, sente orgullu, tanba inaugura Timor-Leste nia planta jerasaun oksijenu ba dahuluk iha HNGV, fasilidade ne'e uza teknolojia ne'ebé matenek hodi transforma anin regulár ba oksijeniu ne'ebé moos,”dehan Diretora rejional OMS.