- Publika iha: 22 Outubro 2024
Embaxadora Estados Unidos America (EUA) Donna Ann Welton hateten, parte EUA halo kooperasaun ho Ministériu Juventude Desportu no Arte Kultura (MJDAK), hodi haree ba situasaun real liuliu menus kampu-traballu ba joven sira iha Timor-Leste.
“Iha sorumutu ho Ministru Juventude Desportu no Arte Kultura Timor-Leste nian, hodi koalia kona-ba joven Timoroan sira ne’ebé ohin loron sei menus kampu-traballu, tan ne’e ba futuru bele haforsa di’ak liutan iha setór sira no fiar katak ami bele servisu hamutuk ho Ministru hodi bele haree ba situasaun sira ne’ebé joven sira enfrenta iha Timor-Leste,” Dehan Embaxadora EUA Welton.
Iha sorin seluk Ministru MJDAK Nelio Isaac Sarmento hateten, futuru nasaun nian iha joven sira-nia liman ho nunee presiza halo investimentu ba joven sira liuliu ba futuru.
“Joven maka futuru ba nasaun nian ho ida-ne’e maka presiza halo investimentu ba joven sira, aliende ne’e Embaxadora EUA ko’alia ho ami kona-ba esperiénsia iha Amerika ba joven sira no nia koalia mós kona-ba situasaun ne’ebé Timor-Leste enfrenta liuliu ba joven,” Dehan MJDAK Sarmento.
Nia hatutan, Embaxadora EUA mós kompromete atu apoiu liuhusi formasaun ba joven sira, tanba haree ba situasaun ne’ebé Timor-Leste.
“Embazadora EUA haree mós ba problema ne’ebé ita-nia nasaun enfrenta liuliu ba joven sira, ho ida-ne’e maka hakarak atu kolabora no apoiu ita, ita sei tau inportansia ba formasaun sira ba joven sira kona-ba lideransa no edukasaun sivika sira-ne’e hotu hodi bele prepara joven sira di’ak liutan,” nia dehan.