- Publika iha: 16 Março 2012
Diretor Nasional Rekursu Humanu Ministeriu Saúde (DNRH-MS) hakfodak bainhira simu informasaun husi estudante espesialista na’in rua ne’ebe estudu hela iha Indonezia katak sira seidauk hetan osan subsidiu tanba ekipa rekursu humanu transfere ona osan subsidiu ne’e iha kedas dia 25 Janeiru.
“Osan ami haruka tiha ona iha dia 24 – 25 de Janeiru maibe iha kazu rua ida mak uniku e aneh liu halo ita hakfodak tanba osan haruka fulan ida resin ona maibe estudante sira lasimu no ami esforsu ona haruka fali bukti transfere ba iha doutor ne’e maibe nia dehan seidauk simu nafatin no sira husu iha Banku mos dehan laiha dokumentus ida sala,” dehan Diretor DNRH, Duarte Ximenes, semana kotuk (24/02) iha nia knar fatin Kaikoli Dili.
Diretor ne’e hatutan, estudante ne’ebe seidauk simu nia osan subsidiu mak naran Dr. Abraham Gregorio de Rosa foti espesialista Radiologia iha Indonesia e restu simu hotu ona.
Alende ne’e iha mos kazu hanesan ba estudante ida naran Emanuel Ramos ne’ebe foti espesialista mos iha Fiji nia osan haruka ona maibe latama nia kolega seluk simu hotu ona.
“Ami nunka hare osan ami halo prosesu deit katak ami asina fo ba ministru asina haruka ba iha finansan Nasional prosesa haruka ba iha estudante sira nia konta bankaria ida –ida tanba ami laiha relasaun ho osan maibe ami prosesu deit,” nia dehan.
Iha lidun seluk Xefi Departamentu Rejiisto Dezenvolvimentu Profesional Saúde, Duarte Marcal de Araujo husu ba estudantes sira atu lori karta transferensia ba cek iha Banku ne’ebe sira rai osan ba nasaun ne’ebe sira hala’o estudu ba tanba osan haruka ona.
“Sira ne’ebe iha Indonezia ne’e sira nia osan hotu-hotu iha Banku Mandiri no iha balun mos iha banku ANZ,” dehan de Araujo.
Xefi de Araujo hatutan, osan subsidiu ba estudante saúde sira ne’ebe hala’o estudu iha estranjeiru no iha rai laran ne’e iha oin rua mak hanesan ida husi doadores supporta ba iha Ministeriu Saúde (Health Sektor Strategic Plan Support) nia prosesu ne’e Ministerio Saude hatama pedido no halao prosesu hatama ba iha sector suppor tranfere ba estudante sira nia konta bankaria ministeriu saude hein simu deit karta transferensia.
Ida seluk mak fundu capital umanu mos hanesan estudante sira hotu iha karta kontratu hakerek osan hira mak sira sei simu iha fulan nen ministerio halao prosesu haruka ba iha fundu capital umanu no transfere ba iha estudante sira nia konta bankaria.
Nia mos hatutan katak osan selu ba eskola ne’e ministerio saúde halao transferensia direitamente ba iha konta bankaria instituisaun ida –idak nia laliu husi estudante sira.
Eqipa atendimentu ba bolsu estudu internal no exsternal informa katak durante fo atendeimentu difikuldade ne’ebe sira hasoru mak rekursu umanu tanba iha estudante barak maibe ema ne’ebe atende nain tolu deit.