- Publika iha: 27 Agosto 2011
Realidade aktual nebe akontese iha Timor-Leste hatudu katak liu-liu ba inan sira nebe isin rua la asesu ba fasilidade saude hetan impakto boot ba sira nia saude tamba la halao imunizasaun kompleto husi hospital ka centru saude sira.
Responsavel maternidade Klinika Bairo-Pite (KPB), Fransisca Cardozo, hateten katak, durante fulan Junho 2011 nia laran nia parte hetan inan partu hamutuk atus ida (100) inklui nain rua tranfere ba Hospital Nasional Guidu Valadares (HNGV) tamba hetan koplikasaun, no nain tolu hetan premature (fula la to’o ke-hira).
“Liu-liu ba nain rua nee, inan ida nia oan primeiru ho nia kidun mak sai uluk. Depois inan ida tan bebe moris ho asfisia todan. Asfixia katak bebe moris mai nia iis la dun diak, fuan la dun diak, kor mos la dun diak, entaun ida nee ami halo pertolongan pertama [assistensia primeiru socorro], depois ami tenki transfere ba Hospital Nasional para fo asistensia diak ba sira,” hateten Responsavel Maternidade Cardozo iha KBP, Dili, semana kotuk.
Tuir Responsavel Cardozo katak, ba partu komplikadu nebe KPBP transfere ba HNGV nee tamba iha hospital nasional iha doutor espesialista ne’ebe bele fo atendimentu espesializadu ba inan rua ne’e no fo tratamentu diak ba sira para bele halao partu normal.
“Antes ami transfere ba hospital nasional ne’e primeiru ami tau soru, ami sona okxi, fo miikrostop, I saida deit mak pertolongan partama nee ami halo hotu ona, tamba ran sei sai nafatin. Ne’e ami tenki transfere ba hospital nasional, laos dehan katak ami nia fasilidade menus nemak ami transfere ba, maibe iha neba iha doutor espesialista bar-barak nemak ami transfere ba atu nune para sira bele fo atendimentu nebe diak liutan.”
Nia mos hatutan katak, nia parte halao atendimentu hanesan bai-bain maibe falta rekursu humanus liu-liu ba parteira limitadu iha KBP ba area maternidade nian, maibe nia parte sei esforsu a’an nafatin atu fo asistensia nafatin ba inan isin rua sira nebe partu no antes partu.
Entretantu Cecilia Branco Soares nudar estudante nebe halao estagiu hela iha KBP hatutan katak ba inan isin rua sira nebe la dun ba asesu fasilidade saude hodi hetan konsulta ka hetan imunizasaun kompleto diak liu ba asesu fasilidade saude para hetan imunizasaun kompleto wainhira too tempu partu lalika hetan komplikasaun.
“Hau senti ba inan isin rua sira diak liu ba fasilidade saude para hetan imunizasaun, simu vitamina, konsulta para too tempu atu partu nee lalika hetan kmplikasaun, tamba agora dadauk dala barak inan sira kuandu isin rua nee sira la dun asesu ba fasilidade saude entaun ida nemak afeta ba inan sira nia saude, tamba nemak tinan ba tinan numeru ba mortalidade inan ho oan nee sempre sae nafatin,” hateten estajiaria Cecilia.
Iha nia parte mos, Berta Da Silva, nudar inan nebe partu iha KBP hatutan katak, ba inan sira nebe isin rua fasilidade saude importante liu tamba bele fo ajuda oinsa too tempu partu no depois de partu. I liu husi fasilidade saude sira bele hetan imunizasaun kompleto no hetan asistensia diak husi doutor sira ou infermeru sira nebe halao tratamentu ba populasaun.
“Iha parte ida inan balun dehan fasilidade saude la importante maibe ba hau rasik antes ita partu nee ita tenki ba Sentru Saude ka Hospital para ita fo imunizasaun diak, fo aimoruk, konsulta para too tempu ita partu nee ita lalika hetan komplikasaun, tamba dala ruma ita mak lakoi ba fasilidade saude too tempu partu entaun ita mak hakarak habadak ita nia vida laos ba doutor sira ka infermeiru sira,” hateten inan da Silva.