- Publika iha: 27 Agosto 2011
Durante iha Janeiru to’o Maiu 2011, iha inan na’in 6 mate hafoin partus iha Ospital Nasional Guido Valadares (HNGV) iha sala maternidade tanba hetan moras komplikasaun.
Tuir Xefe Sala Maternidade HNGV, Maria Saozinha Gomes katak kada fulan iha inan 700 mak partus iha ospital e partus normal iha 400 no nain 6 mate tanba komplikasaun.
“Sira na’in 6 ne’ebe mate ne’e tanba sira tama mai ho kondisaun grave los, ran fakar uluk, tensaun maka’as, ran menus entaun ne’e tama ona ba komplikasaun ne’ebe grave no labele ona fo asistensia ba sira,” hateten Maria Saozina Gomes, semana kotuk iha HNGV, Bidau Toko Baru, Dili.
Tuir nia, ba inan sira ne’ebe mate tanba hetan moras komplikasaun ne’e tanba durante bebe iha isin nunka ba konsulta ou simu imunizasaun la kompletu.
Alende inan nain 6 mate, iha mos inan ho oan mate hotu, balun oan mate iha kabun laran e ida ne’e dala barak akontese ba inan sira ne’ebe la konsulta iha fasilidade saude hodi hetan vitamina. “Balun la deskansa tanba servisu, entaun buat hirak ne’e bele afeita ba sira nia kondisaun no bainhira partus sira hetan komplikasaun,” nia afirma.
Tanba ne’e nia parte husu ba komunidade sira liu-liu ba inan sira ne’ebe isin rua, tenke mai iha fasilidade saude atu hetan imunizasaun, simu vitamina, konsulta nune’e bainhira tempu partus labele hetan komplikasaun.
Iha parte seluk Santina de Jesus , inan ida ne’ebe partus iha ospital ne’e, sente kontente partus iha ospital tanba parteira no doutor sira bele ajuda e “ita sente ladun moras tanba iha doutor no parteira ne’ebe pronto atu ajuda ita,”nia dehan.
“Ne’ebe diak liu ita mai iha fasilidade saude nune’e labele hetan susar bainhira partus.”