ICS Fo Apoiu Rekursu Humanu Ba KBP

Fundasaun Instituto Sensia Saude (ICS) apoia rekursu humanu no orsamentu ba Klinika Bairo-Pite, hodi re-ativa servisu atendimentu internamentu (baixa) nian ba pasiente ne’ebe nesesario.

Fundador ICS, Antonio Moreira hateten hanesan sidadaun ne’ebe iha sentimentu solidario no iha kbi’it iha obrigasaun atu ajuda malu liu husi re-ativa servisu atendimentu iha klinika hodi fo asistensia ba komunidade kibi’it laek sira.
Nia dehan, apoia ne’ebe sira fo mak rekursu humanu atu koloka ba iha unidade sira ne’ebe iha hodi fo asistensia saude ba pasiente sira ne’ebe presiza no fundus ki’ik atu re-ativa servisu atendimentu internamentu (baixa).
“Ita hotu hatene, klinika ne’e fo asistensia ba pasiente hamutuk 300 resin kada loron, se klinika ne’e taka, sei mosu dezastre bo’ot ba iha ita nia nasaun, tanba ne’e ami fo apoiu tuir ami nia kbi’it atu klinika ne’e nafatin eziste hanesan bai-bain,” nia hateten iha konferensia imprensa iha Klinika Bairo-Pite, Dili.
Nia dehan, professional saude ne’ebe sei koloka ne’e mai husi rai laran no rai liur ne’ebe finansia husi fundasaun rasik.
Nia informa, sira nia apoiu ne’e sei to’o governu definitive iha ona atu governu bele kontinua haree ba kestaun ida ne’e.
Iha parte seluk, responsavel klinika dotor Daniel Murphy hato’o agradese ba ICS ne’ebe fo apoiu sira, tanba sira presiza duni hodi kontinua fo asistensia ba komunidade kbi’it la’ek sira.
Nia dehan, oras ne’e dadaun pasiente sira iha deit uma, susar atu fo atendimentu ba sira tanba sira lakohi ba fasilidade saude seluk.
“Klinika seluk iha, maibe ema gosta Klinika Bairo-Pite entaun ami kontente ho apoiu ida ne’e bele funsiona hikas hodi fo servisu ba ema no ajuda saude iha Timor –Leste,” nia hateten
Nia rekonese, katak klinika sei labele moris ho esmola deit, tanba ne’e importante governu tenke tau mos orsamentu tinan –tinan ba klinika atu bele la’o ba oin hodi fo benefisio ba iha povu Timor –Leste.
Nia hatutan, moras ne’ebe registu aas iha klinika mak moras Tubercolouse, moras hada’et husi relasaun seksual hanesan HIV no moras seluk.
Nia dehan, numeru vizitante menus tanba la’os ema lakohi mai klinika, maibe ema hanoin klinika taka ona.*
Nia informa, klinika sei loke nafatin hodi fo atendimentu konsulta ba iha komunidade sira, maibe ba atendimentu baixa mak taka.