- Publika iha: 11 Maio 2018
Durante fulan Abril (2018) nia laran, pasiente emergensia ne’ebe tama iha Banku Urgensia Ospital Nasional Guido Valadares (HNGV) hamutuk nain 4289, ema nain 17 mak mate tanba kondisaun grave.
Xefe Unidade Emergensia, Luciana Celeste Amaral hateten kazu emergensia sira ne’e mak hanesan kazu asidente trafiku hamutuk 144, kazu polisia (ema tuda, baku, rama ambon, violensia domestika no seluk tan) ne’e hamutuk 49 inklui mos moras urgensia sira seluk.
Pasiente nain 17 ne’ebe mate ne’e, nia dehan nain neen (6) mate iha dalan molok to’o iha emergensia no nain 11 seluk mate iha emergensia durante profesional saude sira halo intervensaun mediku.
“Pasiente ne’ebe mate iha emergensia ne’e mai ho kondisaun grave no ho komplikasaun, ita esforsu halo intervensaun maibe labele salva tanba iha ona komplikasaun barak,” hateten iha servisu fatin Bidau, Dili.
Nia dehan, pasiente sira ne’e sofre moras kardiovaskular, urulogia, inspesaun respiratoriu alto no moras sira seluk.
Antes ne’e, joventude Abilio da Silva hateten dezenvolvimentu infra-estrutura HNGV nian komesa diak ona, maibe presiza hadia diak liu tan atu fasilita profesional saude sira liu –liu iha sala emergensia atu fo atendimentu ne’ebe lais no efetivu liu tan hodi salva ema nia vida.
Nia dehan, servisu emergensia ne’e importante tebes no tenke lais tanba pasiente ne’ebe tama ho kazu emeregensia tenke atende lalais
“Hau lori bin ba iha ospital, profesional saude sira iha hela maibe sira la atende lalais, agora ema ida moras atu mate sala –sala deit,” nia hateten
Nia husu, Miniserio Saude atu hadia mekanismu servisu atendimentu iha HNGV liu –liu iha sala emergensia nian tanba dala barak ladun.