- Publika iha: 01 Setembro 2011
Atu estudante sira bele asesu ba iha saneamentu no hijiene ho diak, Care Internasionál servisu hamutuk ho Ministériu Edukasaun (ME) sei halo konstrusaun agúa potavél e saneamentu ba eskola primaria 3 iha sub-distritu Lolotoe distritu Bobonaro.
“Tanba durante ne’e eskola tolu ne’e la iha agúa potavél e saneamentu ,tanba ne’e presiza duni atu halo konstrusaun agúa potavél no saneamantu ba eskola tolu ne’e, “hateten Koordenador ba Projetu Saneamentu Ambiental,Domingos do Rosario hafoin asina akordu ho ME kona-ba projetu ne’e, semana kotuk iha sala konferensa ME,Vila-verde,Dili.
Tuir nia, total orsamentu ba projetu ne’e hamutuk $240.000 e orsamentu atu halo sintina iha $10.000.
“Se laiha obstaklu, ami sei halo konstrusaun durante fulan ida nia laran, hahu fulan ne’e remata no entrega ba eskola iha Setembru,” nia esperansa.
Eskola Primaria (EP) 3 ne’ebé hetan ajudus ne’e mak hanesan EP.Dilai,EP Silabolo no Eskola Primaria Ames iha sub-distritu Lolotoe distritu Bobonaro.
Iha oportunidade hanesan, Diretór Jeral ME, Apolinario Magno hateten dezenu ba uma saneamentu prepara husi ME enkuantu Care mak implementa projetu ne’e hamutuk ho ministériu nia ema iha baze.
“Ami mak prepara dezenu ba projetu no Care mak implementa, sira sei kordena ho ami nia ema sira iha ne’eba,” Magno informa.