Terça, Novembro 24, 2020
Total visitors: 536534

Kordenador Jeral Komisaun Nasional Kombate Surtu COVID-19, iha Ministerio da Saúde (MdS), Doutora Odete da Silva Viegas hateten sidadaun hotu tantu estranjeiru no nasional iha direitu atu husu autokuarantina, maibe tenke prense kriteria no kumpri regras jeral kuarantina nian tanba ne’e laiha diskriminasaun ba atendimentu.

Kordenador Jeral Komisaun Nasional Kombate Surtu COVID-19, iha Ministerio da Saúde (MdS), Doutora Odete da Silva Viegas hateten sidadaun hotu tantu estranjeiru no nasional iha direitu atu husu autokuarantina.

Nia salienta, sira fo dalan no fasilita sidadaun sira ne’ebe husu autokarentina, maibe tenke prense kriteria hanesan fatin tenke iha haris fatin iha laran, laiha ema ne’ebe moras, no durante iha autokuarentina kumpri regras prevensaun COVID-19, liu-liu lahalo kontaktu ho ema seluk iha uma laran.

“Sidadaun sira ne’ebe hetan autorizasaun autokuarantina, ami husu favor kumpri regras hanesan mos sira hela iha kuarantina. Ita bo’ot sira labele hola risku halo enkontru ho ema sira ne’ebe mak ita bo’ot sira hamutuk iha uma, servisu hamutuk. Ami husu ministerio hotu no sosiedade tomak konsidera no servisu hamutuk ho ami atu halo kontrolu ba ida ne’e,” nia hateten iha konferensia imprensa iha sala izolamentu Vera Cruz, Dili.

Nia rekoñese, sira iha limitasaun rekursu atu halo kontrolu 24 oras ba autokuarantina sira tanba ne’e husu sidadaun ida-ida tenke iha konsiensia atu bele kumpri regras sira ne’e hodi evita akontese transmisaun durante iha autokuarantina.

Nia hatutan, dadaun ne’e espasu kuarantina Tibar, Tasi Tolu, Batugade nakonu hotu tanba sidadaun ne’ebe tama ilegal liu husi fronteira terestre lorloron liu ema nain 100 no liu husi aeroportu kada semana.

“Ita koalia kona ba espasu limitadu, maibe direitu sidadaun sira nian atu tama mai rai laran ita mos labele limita. Entaun ita tenke aplika loron 17 fronteira terestre no aero loke tanba agora dadaun aeroportu la kumpri loron 17 kuaze semana-semana ema mai,” nia hatutan.

Iha oportunidade ne’e, nia rekomenda ba ministerio relevante atu aplika sansaun ba sidadaun sira ne’ebe tama ilegal mai iha teritorio hanesan asaun ida atu eduka sidadaun sira, no prevene surtu tanba kazu agora registu makas iha nasaun vizinho Indonesia.

Iha parte seluk, Membru Parlamentu Nasional, Deputado Francisco Miranda Branco nafatin bolu atensaun ba governu atu reforsa serivsu vijilansia iha area fronteira hodi bele prevene nasaun no povu ida ne’e husi ameasa surutu COVID-19.

Nia rekoñese, kondisaun infrastruktura iha fronteira hanesan hela fatin, toba fatin la favorese tanba durante ne’e kompletamente abandonadu hela laiha atensaun husi governu.

“Ita husu reforsa liu tan ita nia fronteira, liu-liu apoia protesaun atu ita nia servisu sira seguransa no profesional saude, imigrasaun bele responde ho diak,” nia hateten.

Nia dehan, kazu registu makas iha nasaun vizinho Indonesia ne’e fo sinal ida ba Timor atu halo asaun rigorozu liu tan hodi prevene situasuan grave ne’ebe sei labele responde.

Nia hatutan, entidade no individu iha responsabilidade bo’ot atu kontribui hodi prevene moras COVID-19 liu husi disiplina aplika protokolu prevensaun ne’ebe rekomenda husi organizasaun mundial saúde no ministerio da saúde hanesan uza maskara, fase liman beibeik, evita atividade sosial.

Iha oportunidade ne’e, nia mos husu governu, liu husi ministerio negosio estranjeiru no koperasaun atu informa ba konsuladu sira kona ba orario loke fronteira ba sidadaun sira tama atu sira labele mai antes, demora iha Atambua Indonesia, tanba uluk kada kuarta feira durante oras rua, maibe agora muda ona loron 17 durante oras rua.

E-mail Subscription

Enter your email address:

Follow us on Twitter

  • House Banner Side Bar 02
  • House Add Side Banner 04