Sábado, Dezembro 05, 2020
Total visitors: 539094

Xefe Departamentu Moras Lahada’et, iha Ministerio da Saúde, Doutor Frederico Bosco hateten programa Pakote Esensial Moras Lahada’et (PEN) nia intervensaun foku ba moras principal hat, inklui moras cardiovascular, moras diabetes, moras pulmonal obstrutivu kronika, no moras kankru iha nivel kuidadu saúde primariu.

Xefe Departamentu Moras Lahada’et, iha Ministerio da Saúde, Doutor Frederico Bosco hateten programa Pakote Esensial Moras Lahada’et (PEN) nia intervensaun foku ba moras principal hat.

Nia dehan, intervensaun ne’ebe halao hahu husi edukasaun promosaun saúde, halo screening hodi identifika sedu, halo tratamentu kontrolu hodi prevene komplikasaun, no deteksaun sedu ba komplikasaun atu evita mortalidade no morbilidade.

“Iha pakote esensial ne’e, ita foku intervensaun ba moras hat principal. Moras cardiovascular ne’e ita hare kona ba moras hipertensaun, fuan, inklui stroke. Moras diabetes, moras pulmonary obstrutrivu kroniku hanesan iis bo’ot, asma. No ikus liu, mak moras kankru mos, barak kankru pulmaun, susun, serviks, no oral,” nia hateten hafoin partisipa iha enkontru avaliasaun implementasaun programa PEN iha JL Vila Comoro, Dili.

Nia dehan, munisipio pilotu ne’ebe implementa programa PEN iha tinan 2017, inklui Dili, Ermera no Liquisa, hatudu progressu signifikante ba servisu tratamentu no kontrolu ba moras lahadaet iha nivel kuidadu saúde primariu tanba sira iha ona sistema registu pasiente ne’ebe organizadu atu bele halo kontrolu.

Nia fo ezemplu, iha sentru internamentu Gleno, uluk ema nain 5 deit mak halo tratmentu regular, maibe agora fulan ida ema kuaze 60 resin halo tratamentu regular.

Nia hatutan, privalensia moras lahada’et a’as tanba fator risku ne’ebe kontribui hamosu moras mos a’as hanesan taxa fuma tabaku a’as kuaze 70% populasaun ho idade adulto fuma, adolsente 31% fuma, abitu hemu tuan kuaze 46% no konsumu masin, mina no midar barak.

“Ita nia sensu uma kain 2015, hateten populasaun ho idade 0-35 ho pursentajen 75, idade 36-59 iha pursentu 25 no idade tinan 60 ba leten pursentu 5. Ne’e signifika Timoroan barak mate sedu iha idade reprodutivu tanba ema ho idade 60 ba leten ita iha deit 5% no ita nia esperansa da vida ne’e ita iha idade 64 deit,” nia hateten.

Nia informa, iha tinan ida ne’e 2020, ministerio ho apoia teknika husi Organizasaun Mundial Saúde atu extende tan programa PEN ba munisipio tolu inklui Baucau, Manatutu, no Bobonaro.

Entretantu, Responsavel Moras Lahada’et iha Servisu Saúde Munisipiu Ermera, Doutora Edinha da Cruz Ximenes hateten implementasaun programa ne’e fo implikasaun ne’ebe diak tebes ba servisu atendimentu ba moras lahada’et.

“Programa ne’e implementa ajuda tebes ami halo registu ne’ebe diak no ami bele follow up pasiente sira nia tratamentu tanba uluk pasiente sira ne’e nia tratamentu la regular tanba ami laiha sistema ida atu registu no kontrolu sira,” nia hateten.

Nia informa, iha sentru saúde Gleno, fulan Setembru nia laran registu pasiente foun hamutuk 39 tanba ne’e total pasiente hamutuk 105 no sira ne’e halo tratamentu regular.

Iha parte seluk, responsavel unidade Moras Lahadaet iha sentru internamentu Vera Cruz, Servisu Saúde Munisipio Dili, Doutor Romel Braz hateten programa ne’e diak, maibe presiza intensifika ho lista aimoruk esensial sira tanba bazeia ba protokolu tratamentu sei iha limitasaun ba medikamentus.

“Ita kontrola diak iha nivel kuidadu primariu ita bele prevene ona komplikasaun sira mosu iha futuru hanesan pasiente mai iha fasilidade mai ho komplikasaun tensaun hanesan moras fuan, matan, rins la funsiona, ne’e mak problema ne’ebe ita hasoru,” nia hateten.

Nia dehan, moras lahadaet ne’ebe dominante mak moras hipertensaun no diabetes tanba kada tinan sira registu pasiente foun aumenta, hanesan iha tinan 2018, registu pasiente hipertensaun 1,161 no diabetes 327, no iha tinan 2019, moras hipertensaun 3,739 no diabetes 372.

E-mail Subscription

Enter your email address:

Follow us on Twitter

  • House Banner Side Bar 02
  • House Add Side Banner 04