Quarta, Janeiro 20, 2021
Total visitors: 543764

Chefe Departamentu Moras Lahadaet, iha Ministerio da Saúde, Doutor Frederico Bosco hateten taxa mortalidade iha Timor 46% kauza husi moras lahadaet no dadus estimasaun hatudu 80% husi 46% ne’e moras cardiovascular, liu-liu problema fuan nian.

Chefe Departamentu Moras Lahadaet, iha Ministerio da Saúde, Doutor Frederico Bosco hateten taxa mortalidade iha Timor 46% kauza husi moras lahadaet no dadus estimasaun hatudu 80% husi 46% ne’e moras cardiovascular, liu-liu problema fuan nian.

Nia dehan, numeru mortalidade kauza husi moras cardiovascular, liu-liu atakasaun fuan sei a’as ba beibeik tanba peskiza fator risku ba moras lahadaet iha tinan 2014, hatudu 43% populasaun sofre moras hipertensaun alteria no husi prevelansia ne’e iha 92% mak lahalo tratamentu regular.

“Ida ne’e mak ita nia situasaun real, ita iha fator risku no kazu mosu dadaun. Maibe ministerio da saude nia esforsu kontinua nafatin, liu-liu ita reforsa hela ita nia atendimentu kuidadu saude primaria liu husi implementasaun pakote esensial ba moras lahadaet,” nia hateten iha Timor Plaza, Dili.

Nia dehan, implementa pakote esensial ba moras lahadaet mak estratejia ida atu haforsa atendimentu saude primaria ho objetivu detekta sedu, halo tratamentu regular, hodi evita komplikasaun no redus mortalidade.

Nia hatutan, governu mos fo ona prioridade atu dezenvolve rekursu umanu iha area fuan nian hodi bele halo intervensaun sekundario ba kazu cardiovascular iha rai laran tanba durante ne’e intervensaun sira referral hotu ba rai liur.

Nia haktuir, agora dadaun mediku espesialista Timoroan nain rua mak halao hela servisu iha hospital nasional, maibe nain ida ba hasai tan kursu subespesializadu iha nasaun Indonesia tanba governu planeia loke sentru internvensaun cardiaku iha rai laran. No mediku nain hat mak halo hela estudu espesializadu ba fuan nian iha nasaun Cuba no sei termina iha tinan oin.

Nia mos informa, fator risku ba moras lahadaet a’as tebes hanesan taxa fuma tabaku a’as tantu idade adulto iha 70% no foinsa’e idade 13-15 iha 30%, 46% populasaun adulto hemu tua lorloron, konsumu masin barak, no lahalo exercisio fisiku tanba ne’e kazu mortalidade no defisiente tanba moras cardiovascular sei a’as ba beibeik.

“Nia la hemu aimoruk regularmente, lahetan tratamentu, no la evita risku sira ne’ebe iha automatikamente iha posibilidade bo’ot atu hetan atakasaun fuan,” nia hatutan.

Entretantu, Chefe Gabinete Kontrola Kualidade no Komunikasaun, iha Hospital Nasional Guido Valdares (HNGV), Sara Maria Xavier informa, iha fulan Outubro nia laran registu sidadaun nain 19 mak mate iha sala emergensia tanba atakasaun fuan no moras komplikasaun.

“Total kazu mate iha sala emergensia ne’e hamutuk nain 19. Husi numeru ne’e nain 11 molok to’o iha hospital mate tiha ona, signifika mate iha dalan ka uma. Maibe nain 8 mate iha sala emergensia tanba kondisaun grave atakasaun fuan no shock setik halo sira mate,” nia hateten.

Iha parte seluk, Vice Presidente Parlamentu Nasional, Deputada Maria Angelina Lopes Sarmento husu instituisaun estado Autoridade Inspesaun no Feskalizasaun Atividade Ekonomiku no Sanitaria (AIFAESA) atu kontrolu produtu sira hodi garantia sanitaria alimentasaun tanba dadus estatistika hatudu moras lahadae’t a’as, liu-liu moras kurasaun.

“Ohin loron ema barak sofre moras kurasaun. Ohin hau lee iha notisia 72% ema sofre moras kurasaun, maibe sira lahatene sira sofre moras kurasaun. Ne’e kauza husi ita nia estilu moris no konsumu lorloron nian,” nia hateten.
Nia dehan, iha lei orsamentu jeral do estado 2021, taxa impostu seletivu ba serveja hasa’e ona husi $1,90 kada litru sa’e ba $2 dolar ba serveza sira ne’ebe iha alkohol ho 4,5%.

Nia rekonese taxa impostu seletivu ba tabaku ki’ik tebes, makes regime kontrolu tabaku ne’ebe aplika ona tenke hare ida ne’e hodi salva guarda saude publika, redus despeza sosial kuidadu saude no promove aumenta progressivu ba reseitas fiskal.

E-mail Subscription

Enter your email address:

Follow us on Twitter

  • House Banner Side Bar 02
  • House Add Side Banner 04