Sexta, Abril 16, 2021
Total visitors: 558227

Vice Ministru da Saúde, Bonifacio Maucoli dos Reis rekonhese implamentasaun programa liga inan iha teritorio tomak hatudu progressu ne’ebe diak tebes iha prestasaun servisu atendimentu saúde inan, liu-liu kuidadu ante natal, interpartu no post partu.

Vice Ministru da Saúde, Bonifacio Maucoli dos Reis rekonhese implamentasaun programa liga inan iha teritorio tomak hatudu progressu ne’ebe diak tebes iha prestasaun servisu atendimentu saúde inan, liu-liu kuidadu ante natal, interpartu no post partu.

Nia salienta antes programa ne’e implementa iha tinan 2012, taxa inan partus iha fasilidade saúde husi 32% sa’e ba 49% iha tinan 2015. No inan sira ne’ebe partus ho asistensia husi profesional saúde husi 48% iha tinan 2012, sa’e ba 62% iha tinan 2015, no inan sira ne’ebe buka atendimentu kuidadu post natal husi 26% iha tinan 2012, sa’e ba 51% iha tinan 2015.

“Ne’e signifika katak inan isin rua sira nia hahalok hetan mudansa durante implementasaun programa liga inan. Mudansa akontese tanba inan sira simu mensagen regular husi profesional saúde sira fo hanoin beibeik sira kona ba hahalok saúdavel no enkoraja sira buka asistensia,” nia hateten bainhira partisipa iha serimonia lansamentu programa liga inan iha Munisipio Dili iha Sentru Saúde Comoro, Dili.

Nia dehan meus ida ne’e ajuda inan sira atu koalia ho familia kona ba hahalok saúdavel, risku perigu isin rua, planu partu no fo espasu ba oan tuir mai tanba inan sira bele iha kontaktu via telephone regular ho profesional saúde sira.

Nia informa programa liga inan ne’e implementa ona iha 12 munsipios inklui Rejiaun Administrativu Espesial Oecusse-Ambeno (RAEOA) ho apoia fundus husi governu Australia.

Nia espera programa liga inan ne’e no atividade seluk bele kontribui hodi redus mortalidade no morbilidade inan no oan ne’ebe sei a’as ho rasio mortalidade 195/100.000 inan partus iha tinan 2015.

Entretantu, Diretor Programa Liga Inan, iha Organizasaun Health Alliance International (HAI), Paulo Vasconcelos hateten governu konsidera programa ne’e importante no habelar ona ba munisipio tomak inklui RAEOA atu bele hasa’e kobertura atendimentu ba saúde inan no oan hodi kontribui ba redusaun mortalidade iha rai laran.

“Progressu bo’ot ne’ebe atinji maka agora programa ne’e implementa iha teritorio laran tomak, signifika sei la husik hela inan isin rua ida,” nia hateten.

Nia dehan dezafiu ne’ebe sira enfrenta durante implementasaun programa iha tinan 2013 maka rede telemovel no alfabetu tanba iha area rural inan barak la hatene lee, entau sira tenke hetan akompaniamentu husi familia balun atu llee mensagen ne’ebe profesional saúde sira manda ba sira.

Nia informa total inan isin rua ne’ebe registu ona iha sistema liga inan to’o iha loron 25 Febreiru hamutuk ona 78,099, no husi ne’e nain 45,886 maka partus ona, maibe kontinua simu mensagen husi profesional saúde sira kona ba nutrisaun no seluk tan.

Iha parte seluk, Embaixador Australia iha Timor-Leste, Peter Roberts hateten governu Australia kontente suporta implementasaun programa ne’e tanba simples no efetivu tebes kria ligasaun no komunikasaun diak entre profesional saúde no inan sira.

Nia dehan sira apoia fundus ba implementasaun programa ne’e hahu iha tinan 2015, to’o 2021, kuaze gasta ona osan 7 milhoens dolar amerikanu.

“Tinan ne’e hanesan oportunidade ba tranzisaun programa liga inan ba ministerio da saúde maka atu jere no sira hatudu ona komitmentu tanba ita hotu rekonese programa ne’e diak no fo benefisio ba timor oan, liu-liu inan isin rua sira no bebe sira,” nia hateten

Nia hateten governu Australia iha komitmentu atu servisu diak liu tan ho governu Timor-Leste, liu-liu ministerio da saúde iha futuru, no iha situasaun difisil hanesan dadaun luta hasoru pandemia Covid-19.

E-mail Subscription

Enter your email address:

Follow us on Twitter

  • House Banner Side Bar 02
  • House Add Side Banner 04