Sábado, Junho 19, 2021

Diretora Jeral Prestasaun Servisu Saúde, iha Ministerio da Saúde, Doutora Odete da Silva Viegas informa hahu lansamentu loron 7 to’o 28 fulan Abril, sidadaun nain 27,000 resin maka simu ona vasina AstraZeneca primeru dose.

Diretora Jeral Prestasaun Servisu Saúde, iha Ministerio da Saúde, Doutora Odete da Silva Viegas informa hahu lansamentu loron 7 to’o 28 fulan Abril, sidadaun nain 27,000 resin maka simu ona vasina AstraZeneca primeru dose.

Nia dehan vasina ne’ebe hetan doasaun husi COVAX facility iha faze primeiru ho kuantidade 24,000 dose, maibe depois implementa ultrapasa to’o 27,000 dose tanba vasina botir ida sona ba ema nain 12.

“Ita nia observasaun iha semana hira nia laran hare, ema barak maka intersadu atu hakarak hetan mos vasina alende liña frente sira. Sira ne’ebe la tama grupo prioridade mos hakarak vasina, signifika iha mos antusiasmu husi komunidade sira atu hetan vasina, maske vasina ne’e laos obrigatoriu, maibe ema hotu konsente ona katak moras ne’e iha duni no sai perigu ba vida,” nia hateten iha Parlamentu Nasional, Dili.

Nia dehan implementasaun vasina iha munisipio sira hotu atinji 100%, signifika liña frente sira ne’ebe hetan prioridade konsege vasina hotu, no vasina mos sidadaun sira ho idade 60 ba leten, inklui sira ne’ebe ho moras kronika sira.

Nia rekonhese iha profesional saúde balun rejeita simu vasina tanba tauk no hakarak hein hodi observa implementasaun atu hare vasina ne’e seguru duni maka sira simu vasina.

“Situasaun pandemia sai nafatin ameasa ba mundu, no ita nia rai kazu aumenta ba lorloron. Medida hotu estado atraves husi ministerio da saúde ho parseiru sira halo ona servisu barak, maibe medida uniku prevene moras ida ne’e maka ita utiliza vasina ne’ebe implementa dadaun ona,” nia dehan.

Nia informa organizasaun COVAX Facility komite atu apoia vasina 20%, no iha faze primeru sira haruka ona 24,000 dose mai, signifika sei iha 263,556 dose atu kompleta 20% ne’e tanba ne’e iha fulan Junho sei to’o tan vasina ho kuantidade 60,000 dose.

Entretantu, Diretur Servisu Saúde Munisipio Lautem, Bernardo Amaral Lopes hateten sira konsegue fo vasina ba sidadaun hamutuk 814, no sira ne’e maioria servisu iha liña ferente hanesan profesional saúde, autoridade seguransa, inklui mos komunidade voluntario sira ne’ebe hakarak vasina.

“Ema balun tauk, maibe barak maka telephone ami husu wainhira maka sira bele hetan vasina. No ami dehan seidauk tanba faze primeiru ne’e ba ekipa liña frente sira,” nia hateten.

Nia dehan ema tauk tanba informasaun sira ne’ebe la loos kona ba vasina ne’e, maibe sira nafatin halo edukasaun no sensibilizasaun ba komunidade sira kona ba importansia vasina atu protese aan husi virus ne’e no vasina ne’e seguru.

Iha parte seluk, Membru Parlamentu Nasional, Deputado Adriano Nascimento preokupa ho situasaun evolusaun surtu iha rai laran ne’ebe tama ona iha klasifikasaun transmisaun kominitaria tanba potensilidade bo’ot monu ba kondisaun ne’ebe a’at liu.

Nia dehan situasaun ida ne’e akontese tanba timor oan lubun maka ignora pratika regras husi Organizasaun Mundial Saúde nian, no minimiza faktu sira kona ba Covid-19.

“Situasaun sira nee akontese tanba grupo balun halo kampanha sistematika no strukturadu ho interese pesoal no grupo hodi habelar katak COVID ne’e bosok la ejiste,” nia dehan.

“Hau rekomenda ba governu halo ona swab test masal iha Dili no munisipio seluk, no tenke intensifika ona servisu vasinasaun ba Timoroan hotu, no aplika regras ho rigorozu, no tenke kriminaliza no penaliza grupo sidadaun ne’ebe halo kampanha sistematika no organizadu hodi fahe informasaun hoax liu husi sosial media katak COVID ne’e bosok, vasina ne’e ladiak halo ema mate.”

E-mail Subscription

Enter your email address:

Follow us on Twitter

  • House Banner Side Bar 02
  • House Add Side Banner 04