Sábado, Junho 19, 2021

Ministerio da Saúde (MdS) hamutuk ho Organizasaun Mundial Saúde (OMS) hahu fo formasaun primeiru sokoru psikososial ba pesoal liña frente sira, ne’ebe hahu ho professional saúde sira ne’ebe halao servisu iha fatin izolamentu no kuarentina, atu sira bele iha abilidade identifika problema no kontrola emosaun hodi kontinua fo atendimentu ba pasiente sira.

Ministra da Saúde, Doutora Odete Maria Freitas Belo hateten formasaun ne’e importante tebes ba ekipa servisu liña frente sira, liu-liu professional saúde sira tanba sira nia servisu lorloron hasoru presaun makas, ne’ebe bele afeta sira nia kondisaun mental.

Ministra da Saúde, Doutora Odete Maria Freitas Belo hateten formasaun ne’e importante tebes ba ekipa servisu liña frente sira, liu-liu professional saúde sira tanba sira nia servisu lorloron hasoru presaun makas, ne’ebe bele afeta sira nia kondisaun mental.

“To’o ona tempu laos atu hare deit Covid-19, maibe kondisaun mental profesionais saúde, pasiente sira iha sala izolamentu no kuarentina. Liu-liu ba ami pesoal saúde ne’ebe ita hotu hatene, wainhira ami halo swab test no tratamentu hetan insulta, asediu seksual mos akontese. Entau ami hare presiza prepara pesoal saúde sira mais forte intermus fisiku, mental atu bele fo asistensia medika ba maluk sira ne’ebe positivu Covid-19, no sira ne’ebe iha kuarentina,” nia hateten hafoin partisipa iha serimonia abertura formasaun apoia psikososial bazika ba pesoal saúde sira iha Hotel Novu Turismo, Dili.

Nia konsiente ema hotu hetan no sente konsekuensia surtu Covid-19, ne’ebe direita no indiretamente afeta kondisaun mental ema nian tanba governu foti desizaun aplika estado emergenisa ho regras ne’ebe limita ema nia movimentu, maibe iha faze premeru orienta ekipa liña frente sria, liu-liu profesional saúde sira.

Entretantu, Psikologista Klinika Idalina Borges hateten material ne’ebe sira sei fo ba pesoal saúde sira maka kuidadu aan intermus saúde mental, oinsa identifika problema emosional atu bele kontrola aan durante halao serivsu, oinsa halo komunikasaun ne’ebe suportivu atu pasiente sira sente konfortavel no ezersisio seluk atu mantein kondisaun ne’ebe diak.

“Ita hatene reasaun ema ida-ida nian iha situasuan komflitu, pandemia lahanesan. Entau ita ida-ida tenke prepara aan no iha rezerva rekursu fisiku, mental tanba ema balun mai ho siak, halo stigma,” nia hateten.

Nia dehan pesoal liña frente sira tenke iha abilidade primeiru sokoru psikososial tanba iha sira nia servisu lorloron hasoru dificuldade oioin, ne’ebe automatikamente afeta sira nia kondisaun fisiku no emosional.

Iha parte seluk, Health Policy Adviser, iha Organizasaun Mundial Saúde Timor-Leste, Doutor Vinay Bothra hateten problema saúde publika bo’ot ne’ebe mundu enfrenta husi konsekuensia surtu Covid-19 maka saúde mental, maibe nasaun barak seidauk koalia no fo atensaun ba problema ne’e.

“Stigma iha fatin hotu, ita hare iha televizaun profesionais saúde sira halo servisu komunidade sira hakilar no tuda sira. No pasiente sira ne’ebe ho Covid-19 familia no sosiedade halo stigma ba sira, ne’e problema saúde mental. Laos setor saúde deit, maibe ekonomia iha mundu monu ema laiha servisu, laiha osan, laiha aihan ba familia stress, ne’e problema saúde mental,” nia hateten.

Nia espera inisiativa diak ne’ebe ministerio da saúde hahu ho apoia husi OMS ne’e bele hasa’e abilidade profesionais saúde sira nian atu ajuda komunidade sira iha situasaun krize mundial ida ne’e.

E-mail Subscription

Enter your email address:

Follow us on Twitter

  • House Banner Side Bar 02
  • House Add Side Banner 04