Diretor Executivu Servisu Autonom Medikamentu no Ekipamemtu Saúde (SAMES), Santana Martins hateten sira aluga tan kareta malirin unidade rua atu halo transportasaun vasina Covid-19 ba munisipio sira tanba sira iha deit kareta malirin ida.

Diretor Executivu Servisu Autonom Medikamentu no Ekipamemtu Saúde (SAMES), Santana Martins hateten sira aluga tan kareta malirin unidade rua atu halo transportasaun vasina Covid-19 ba munisipio sira.

Nia dehan kareta rua ne’ebe sira aluga ho kustu $165 loron ida tanba ne’e koko atu aluga tuir tempu ne’ebe iha, entau durante ne’e kareta ida kobre rejiaun leste kompostu husi munisipio Manatutu, Baucau, Lautem no Viqueque. No kareta ida seluk kobre rejiaun oeste kompostu husi Dili, Ermera, Liquisa, Bobonaro, kareta ida seluk fali kobre Aileu, Ainaro, Covalima, Manufahi. No Rejiaun Espesial Oecusse transporta ho aviaun.

“Kareta malirin ne’e laos deit ba vasina Covid-19, maibe hodi transporta mos vasina rutina sira inklui reajente sira laboratorium nian tanba sira mos tenke tuir rekejitus temperature ne’ebe iha,” nia hateten bainhira partisipa iha serimonia simu vasina AstraZeneca 100,800 doze husi COVAX Facility iha aeroportu internasional, Presidente Nicolau Lobato, Dili.

Nia informa dadaun ne’e vasina Sinovac hamutuk 100,000 doze no AstraZeneca hamutuk 100,800 doze, maka rai hela iha armajen central tanba ne’e sira sei halo esforsu atu halo distribuisaun ba munisipio sira ho seguru, liu-liu asegura kualidade produtu ne’e diak to’o ba komunidade sira.

Nia dehan eletrisidade laiha problema tanba sira iha jelador ida no parte eletrisidade mos instala ona filel rua espesifiku ba armajen. No sira mos organiza ona pesoal sira atu halo rotasaun servisu durante 24 oras atu tau matan ba produtu vasina iha armajen central, liu-liu kontrola temperature sira tanba vasina ne’e la fasil atu hetan iha situasaun agora.

Iha parte seluk, Reprezentativu UNICEF iha Timor-Leste, Bilal Durrani hateten sira servisu besik ho SAMES atu fortalese sistema malirin hodi transporta no asegura vasina sira ho temperature ne’ebe apropriadu.

“Ita agora iha hela prosesu hodi sosa tan kamara frigurifiku adisional, refrijerador solar no kareta refrijerador ba armazen rejional sira no fasilidade saúde sira ne’ebe do’ok husi Dili,” nia hateten

Nia dehan sistema sira ne’e forte laos deit ajuda susesu implementasaun vasina Covid-19 nian, maibe imunizasaun rutina sira ne’ebe durante ne’e halao iha rai laran ba labarik sira.